കണ്ണൂർ യാത്രയിൽ നഷ്ടപ്പെട്ട 1000 രൂപയും കെഎസ്ആർടിസി ബസ് കണ്ടക്ടറും

വിവരണം – പ്രിനു കെ.ആർ. പടിയൂർ.

ഒരു ലക്ഷം പൈസ അതായത് എന്റെ 1000 രൂപ വീണുപോയി ഗയിസ്. രാവിലെ 300 രൂപയും കീശയിലിട്ട് ,പ്ലാന് പഞ്ചായത്ത് ഓഫീസിൽ പോക്ക്, ബിൽഡിംഗ് പെർമിറ്റ് അപേക്ഷ കൊടുക്കൽ തുടങ്ങിയ ആവശ്യങ്ങളുമായാണ് വീട്ടിൽ നിന്നും പുറത്തേക്കിറങ്ങിയത്. നിശ്ചയിച്ചുറപ്പിച്ച പണി പൂർത്തിയാക്കി നിൽക്കുമ്പോഴാണ് ആ ഫോൺ എത്തിയത് വയനാട്ടുകാരൻ സുനി ഏട്ടൻ എന്റെ മരപ്പണി വർക്ഷോപ്പിന്റെ ഓപ്പോസിറ്റ് ഉള്ള റോസ് ലാൻഡ് ഗാർമെന്റ്സ്സിൽ വർക്ക് ചെയ്യുന്ന സുനി. എന്താ മോനെ സുനിഏട്ടാ ?

എടാ എന്റെ മുതലാളിയുടെ കൈയിൽനിന്നും ഒരു 2000 വാങ്ങി ഗൂഗിൾ പേ ചെയ്തു തരുമോ? പിന്നെന്താ ചെയ്തേക്കാം. മുതലാളി രണ്ടായിരത്തിനു പകരം 3000 തന്നെ കയ്യിലേക്ക് തന്നു. 2000 ഗൂഗിൾ പേ ചെയ്തു കൊടുക്കുകയും ബാക്കി ആയിരം കിട്ടുമ്പോൾ വാങ്ങിച്ചോളാനും പറഞ്ഞു. ഇതിപ്പോ ലാഭായല്ലോ ആയിരം രണ്ട് ദിവസത്തേക്ക് തിരിക്കാം. 300 രൂപയുമായി ഇറങ്ങിയ എന്റെ കീശയിൽ ഇപ്പോൾ 3300.

പണിയൊക്കെ കഴിഞ്ഞ സ്ഥിതിക്ക് ഇന്ന് വലിയ തിരക്കില്ല എങ്ങോട്ടെങ്കിലും യാത്ര ചെയ്താലോ? തേടിയ വള്ളി കാലിൽ ചുറ്റി എന്നപോലെ ഒരുത്തൻ വന്നു പെട്ടു. ആൾക്ക് ഒരാവശ്യത്തിന് കണ്ണൂർ ദേശാഭിമാനി വരെ പോണം. ആഹാ കൊള്ളാലോ ദിവസവും രാവിലെ കാണുന്ന ദേശാഭിമാനി പത്രം അച്ചടിക്കുന്ന സ്ഥലം എന്നാൽ ഒന്ന് കണ്ടു കളയാം. അവനോടൊപ്പം ഞാനും
കണ്ണൂരിലേക്ക് വണ്ടികയറി.

പള്ളിക്കുന്നിലെ ദേശാഭിമാനിയും കണ്ട് ഒരു കുഞ്ഞി ബിരിയാണി കൂടി കഴിഞ്ഞപ്പോൾ സമയം 3 മണി. കണ്ണൂർ പുതിയ ബസ്റ്റാൻഡ് എന്തു മനോഹരമായാണ് ഡിസൈൻ ചെയ്തിരിക്കുന്നത്. സംസാരങ്ങളിൽ കണ്ണൂർ ബസ്റ്റാൻഡ് നിറഞ്ഞുനിന്നു. ബസ്റ്റാൻഡ് സൗന്ദര്യം എന്തുകൊണ്ടോ ഇന്നാണ് മനസ്സിൽ വല്ലാതെ പതിഞ്ഞത്. കണ്ണൂർ പുതിയ ബസ്റ്റാൻഡ് നിർമ്മിച്ച കെ കെ ഗ്രൂപ്പിന്റെ
വീരകഥകളും മനസ്സിൽ നിറഞ്ഞു. കേരളത്തിലെ തന്നെ ഏറ്റവും മനോഹരമായ ബസ്റ്റാൻഡ് ഇതു തന്നെ ആവണം. കണ്ടിടത്തോളം വെച്ച് അങ്ങനെയാണ് തോന്നുന്നത്.

നാട്ടിലേക്കുള്ള ബസ് നിർത്തുന്ന സ്ഥലത്തുകൂടി നടക്കുമ്പോൾ കൺഫ്യൂഷൻ… ഇരിട്ടി വഴി പോകണോ? ഇരിക്കൂർ വഴി പോകണോ? രണ്ടു വഴി പോയാലും രണ്ടു ബസ് കയറിയാലേ സാധാരണഗതിയിൽ പടിയൂരിൽ എത്തു. എനിക്ക് ഇരിട്ടി വഴി പോകാനാണ് എപ്പോഴും കൂടുതൽ താല്പര്യം. അല്ലെങ്കിലും പടിയൂര്കാർക്ക് ഇരിക്കൂറീനേക്കാൾ ഇഷ്ടം ഇരിട്ടി തന്നെ.

അപ്പോഴാണ് ദാ മുന്നിൽ ഒരു കെഎസ്ആർടിസി ബസ്.. പതുപതുത്ത സീറ്റോ പാട്ടോ ഇല്ലെങ്കിലും പണ്ട് മുതലേ കെഎസ്ആർടിസി കണ്ടാൽ അതിലാണ് കയറാറുള്ളത്. എന്തോ നമ്മുടേതാണ് എന്ന തോന്നലാവാം. ഇപ്പോ ചില കെ എസ് ആർ ടി സി യിൽ പാട്ടുമുണ്ട്. പക്ഷേ ഈ കെ എസ് ആർ ടി സി യിൽ കയറാൻ മറ്റൊരു കാരണം കൂടിയുണ്ട്. ഈ ബസ് കണ്ണൂരിൽ നിന്നും ഇരിക്കൂർ വഴി ഇരിട്ടിയിലേക്ക് ആണ്. നമ്മുടെ പടിയൂര് വഴിയാണ് ഈ ബസ് കടന്നുപോകുന്നത്. കണ്ണൂരിൽ നിന്നും ഒറ്റ ബസിന് നാട്ടിലെത്തും. ജീവിതത്തിൽ ആദ്യമായിട്ടാണ് കണ്ണൂരിൽ നിന്നും ഒറ്റ ബസിൽ പടിയൂര് എത്താൻ പോകുന്നത്.

കൃത്യം മൂന്നേ 15ന് വണ്ടി പുറപ്പെട്ടു. മഴ മാറി നിന്ന പകൽ ഇതുവരെയും സമ്മാനിച്ച ചൂടിന് ആശ്വാസമായി ബസ് ഓട്ടത്തിലെ കാറ്റ് എത്തി. ഉള്ളിലെ ബിരിയാണി കണ്ണുകൾക്ക് നിർദ്ദേശം കൊടുത്തു. പതിയെ കണ്ണുകൾ അടഞ്ഞു. അല്ലെങ്കിലും ബസിലിരുന്ന് ഉറങ്ങാൻ ഒരു പ്രത്യേക സുഖമാണ്. ഉറക്കത്തെ തടസ്സപ്പെടുത്തി ഫോണിലേക്ക് മെസ്സേജുകൾ എത്തി. കീശയിൽ നിന്നും ഫോൺ എടുത്ത് രണ്ട് തോണ്ട് തോണ്ടി നെറ്റ് ഓഫ് ആക്കി വെച്ചു. ഇനി സുഖമായി ഉറങ്ങാം.

പാതിമയക്കത്തിൽ കൂടാളിയും, ചാലോടും, ഇരിക്കൂറൂം പിന്നിട്ട ബസ് കുയിലൂർ വളവ് തിരിഞ്ഞ് പടിയൂരിലേക്ക് അടുക്കുന്നു. ഇനി ഉറങ്ങിയാൽ ശരിയാവില്ല. കീശയിലെ മൊബൈൽ എടുത്ത് നെറ്റ് ഓൺ ചെയ്തപ്പോൾ ചറ പറ മെസ്സേജുകൾ. ഉറക്കത്തിൽ നിന്നും കണ്ണുകൾ ഉണർവിലേക്ക്. നാട്ടിൽ ഇറങ്ങിയാൽ ചെയ്യേണ്ട കാര്യങ്ങളിലേക്ക് കടക്കാൻ മനസ്സ് റെഡിയായിക്കഴിഞ്ഞു.

കുറച്ച് പ്രിന്റ് എടുക്കാൻ ഉണ്ട്. രണ്ടുമൂന്നു പേരെ വിളിക്കാൻ ഉണ്ട്. വീണ്ടും പണിയുടെ തിരക്കിലേക്ക്. ഈ യാത്ര സമയം കളഞ്ഞത് അല്ലാതെ പറയത്തക്ക പുതുമ ഒന്നും സമ്മാനിച്ചിട്ട് ഇല്ല. ഒരു കഥ പോലും സമ്മാനിക്കാത്ത യാത്ര അവസാനിക്കുകയാണോ? ആ ദേശാഭിമാനി കണ്ടല്ലോ ഇങ്ങനെയും ഒരു ദിവസം.

ബസ്സിറങ്ങി നേരെ പോയത് ബിൽഡിംഗ് പ്ലാനിന്റെ പ്രിന്റ് എടുക്കാനാണ്. ചേച്ചി എത്രയായി? 40 രൂപ. കീശയിൽ കൈ ഇട്ട് കാശ് എടുത്തപ്പോൾ 2100 രൂപ. 500 ന്റെ 2 നോട്ടുകൾ കാണുന്നില്ല. ശെടാ ഇതോടെ പോയി? തിരിച്ചും മറിച്ചും നോക്കി. ഏയ് കീശയിൽ ഇല്ല. കുറച്ചുനാളുകളായി എന്റെ ശരീരത്തിന്റെ ഭാഗമായി മാറിയ ബാഗിലും പരിതി. ഇല്ല ആയിരം കാണാനില്ല. ആയിരം വീണുപോയി. ഇനി ഇപ്പോ എന്ത് ചെയ്യും? സുനി ഏട്ടനോട് എന്ത് പറയും? ഞാൻ എന്തായാലും കൊടുത്തല്ലേ പറ്റൂ. കിട്ടുമ്പോ മേടിച്ചോ എന്നൊക്കെ തമാശക്ക് പറഞ്ഞെങ്കിലും പുള്ളിക്ക് നാളെത്തന്നെ കൊടുക്കേണ്ടതല്ലേ? എന്താ ഇപ്പോ ചെയ്യാ.. എന്ത് ചെയ്യാൻ? പോയത് പോയി. എന്തുകൊണ്ടോ സങ്കടമോ നിരാശയോ തോന്നാതെ മറ്റെന്തോ ഒരു ഭാവമാണ് എന്നിൽ വന്നത്. ഒരു നിസ്സംഗഭാവം.

ആയിരം രൂപക്ക് എന്തൊക്കെ കാര്യങ്ങൾ ചെയ്യാം? യാന്ത്രികമായി എന്റെ സി ടി 100 ബൈക്ക് എന്നെയും കൊണ്ട് വീട്ടിലേക്ക് പോയി. റോഡിൽ എങ്ങും പരിചയമുള്ള മുഖങ്ങൾ ആവണം പുലിക്കാട്ടിൽ പാർട്ടി യോഗം നടക്കുന്നുണ്ട്. ഒന്നും ഉള്ളിൽ പതിയാതെ കണ്ണിൽ മാത്രം നിറഞ്ഞു. ചിന്ത മുഴുവൻ ആയിരത്തിൽ ആണ്. എവിടെയായിരിക്കും പോയിട്ട് ഉണ്ടാവുക?മൊബൈൽ എടുത്തപ്പോൾ കീശയിൽ നിന്ന് വീണ്താവും. എങ്കിലും അത് എവിടെ? കണ്ണൂർ ബസ്റ്റാൻഡ്? ദേശാഭിമാനി? ബിരിയാണി ഹോട്ടൽ ? കെഎസ്ആർടിസി?

അന്വേഷിക്കാൻ പറ്റുന്നത് കെ എസ് ആർ ടി സി ബസ്സിൽ മാത്രമാണ്. അത് എന്തായാലും ഒന്ന് അന്വേഷിച്ചു നോക്കാം. ആയിരം അല്ലേ വെറുതെ കളയാൻ പറ്റില്ലല്ലോ. കെ എസ് ആർ ടി സി ബസ്സിലെ കണ്ടക്ടറെ വിളിക്കാൻ എന്താണ് മാർഗം? നാട്ടിലെ പരിചയമുള്ള കെ എസ് ആർ ടി സി കണ്ടക്ടർമാരുടെ മുഖം പെട്ടെന്നുതന്നെ മനസ്സിൽ തെളിഞ്ഞു. പ്രമോദ് ഏട്ടൻ.. വിളിച്ചപ്പോൾ മാർഗ്ഗം പറഞ്ഞു തന്നു. “ഞാൻ ഡിപ്പോയിലെ നമ്പർ തരാം. നീ കണ്ണൂർ ഡിപ്പോയിൽ വിളിക്കുക. ബസ്സിന്റെ ഡീറ്റെയിൽസ് പറയുക. കണ്ടക്ടറുടെ നമ്പർ തരും. വിളിച്ചു നോക്ക്.” വിളിച്ചു, കണ്ടക്ടറുടെ നമ്പർ കിട്ടി.

“ഹലോ.. ഞാൻ നിങ്ങളുടെ ബസ്സിൽ ഇപ്പോൾ യാത്ര ചെയ്ത ആളാണ്. കണ്ണൂരിൽ നിന്നും കയറി പടിയൂരിൽ ഇറങ്ങി. എന്റെ ഒരായിരം രൂപ കാണാതെ പോയിട്ടുണ്ട്. ബസിൽ നിന്ന് വല്ലതും കിട്ടിയിരുന്നോ? ബസ്സിൽ വീണതാണോ എന്നൊരു സംശയം.” “ആയിരം രൂപയോ? ഒരു 500 രൂപ കിട്ടിയിട്ടുണ്ട്. മുൻഭാഗത്തെ ഇറങ്ങുന്ന സ്റ്റെപ്പിന് അടുത്തുനിന്നും വീണുകിട്ടിയ 500 ഒരു സ്ത്രീ ഏൽപ്പിച്ചിരുന്നു. ഞാനൊന്നു നോക്കട്ടെ നിങ്ങളുടെ സീറ്റിന് അടുത്ത്. ഇല്ലാട്ടോ 500 കാണാനില്ല. മിക്കവാറും അത് പുറത്തേക്കു പറന്നു പോയിട്ട് ഉണ്ടാവും. അതിനാണ് സാധ്യത നിക്ക് ഞാൻ ഒന്ന് നോക്കട്ടെ.”

ഇരിട്ടി ബസ് സ്റ്റാൻഡിൽ അടുത്ത കണ്ണൂർ ഓട്ടത്തിന് ആയി നിർത്തിയിട്ട കെഎസ്ആർടിസി ബസിൽ കണ്ടക്ടർ എന്റെ 500 തിരിഞ്ഞുനടന്നു. ഇതാ മറുതലക്കൽ നിന്നും ഒരു സന്തോഷ ശബ്ദം “കിട്ടി കിട്ടി കിട്ടി കിട്ടി… ഹോ ആശ്വാസമായി, നിങ്ങൾക്ക് നല്ല ഭാഗ്യം ഉണ്ട് കേട്ടോ. 500 പറന്ന് പറന്ന് അങ്ങ് ബസിന്റെ മുമ്പിൽ എത്തിയിട്ടുണ്ടായിരുന്നു. ഒരു കാര്യം ചെയ്യ് നമ്മളിപ്പോൾ അതുവഴി വരുന്നുണ്ട്. ഒരു 5.50 ആകുമ്പോൾ പടിയൂരിൽ എത്തും. അപ്പോൾ അവിടെ നിന്നാൽ മതി.

പടിയൂരിൽ കാത്തുനിന്ന എനിക്ക് കണ്ടക്ടർ സീറ്റിലിരുന്ന് അയാൾ 1000 തിരികെ സമ്മാനിച്ചു. വീണ്ടും അത് ആവർത്തിച്ചു നിങ്ങൾക്ക് നല്ല ഭാഗ്യം ഉണ്ട് കേട്ടോ. യാത്രക്കാരെ കയറ്റി ഇറക്കുന്ന ചെറിയ സമയത്തിനിടയിൽ പ്രകടിപ്പിക്കാൻ കഴിയുന്ന നന്ദി സൂചകങ്ങൾ ഞാനും അയാളിലേക്ക് ചൊരിഞ്ഞു. മാസ്കിന് ഉള്ളിൽ അയാളെ നോക്കി ഞാൻ ആത്മാർത്ഥമായി ചിരിക്കുന്നുണ്ടായിരുന്നു. എന്റെ കണ്ണുകളിലൂടെ അയാൾക്കത് മനസ്സിലായിട്ടുണ്ടാവണം.

എങ്കിലും എന്റെ ആയിരമേ, നീ കറങ്ങിത്തിരിഞ്ഞ് എന്റെ കീശയിൽ തിരികെ എത്തിയല്ലോ.. നാളെ സുനി ചേട്ടന്റെ കീശയിലേക്ക് ..അതുകഴിഞ്ഞ് കറങ്ങി കറങ്ങി വേറെ എങ്ങോട്ടൊക്കെയോ.. എന്നിൽ ശാന്തത നിറച്ച് കെ എസ് ആർ ടി സി കടന്നുപോയി. ഹലോ ഗയ്സ് അങ്ങനെ എന്റെ 1000 തിരികെ കിട്ടി ഗെയ്സ്. പൈസ തിരികെ കിട്ടിയതുകൊണ്ട് അതിന്റെ കുറിച്ച് ഒരു പോസ്റ്റ് മുഖത്ത് ചിരി.. എന്താല്ലേ ? ഇല്ലെങ്കിൽ ഈ സമയം “ശെ..ശെ” എന്ന് തല ചൊറിഞ്ഞ് എന്റെ സൂക്ഷമില്ലായ്മയെ സ്വയം പഴിച്ച് കിടക്കുന്നുണ്ടാവും. കറങ്ങി കറങ്ങി കഥ വരുന്ന വഴിയേ…