മൂന്ന് വ്യത്യസ്ത കാലാവസ്ഥകൾ അനുഭവപ്പെടുന്ന മാങ്കുളത്തേക്ക് ഒരു വിനോദയാത്ര

Total
42
Shares

വിവരണം – ബിജുകുമാർ സി.എസ്സ്.

2001ൽ വളാഞ്ചേരി ഹയർസെക്കണ്ടറി സ്കൂളിൽ ആരംഭിച്ച ഔദ്യോഗിക ജീവിതത്തിൽ ആദ്യമായാണ് സഹപ്രവർത്തകരും അവരുടെ കുടുംബാംഗങ്ങളും ഒത്തുള്ള ഒരു വിനോദയാത്ര. ഇടുക്കി ജില്ലയിലെ മാങ്കുളം ഗ്രാമമാണ് ഇതിനായി ഞങ്ങൾ തെരെഞ്ഞെടുത്തത്.

നിബിഡ വനങ്ങളും പശ്ചിമഘട്ടമലനിരകളും വലുതും ചെറുതുമായ ജലപ്രവാഹങ്ങളും അനേകം വെള്ളച്ചാട്ടങ്ങളും ചേർന്നു സമ്പന്നമാക്കിയ അതീവസുന്ദരമായ ഒരു ഭൂവിഭാഗമാണ് മാങ്കുളം. കണ്ണൻദേവൻ തേയില തോട്ടത്തിന്റെ വിരിപാറ ഡിവിഷൻ മുതൽ ആനക്കുളം വരെയാണ് മാങ്കുളം പഞ്ചായത്ത്. 78 ചതുരശ്ര കിലോമീറ്ററാണ് ചുറ്റളവ്. 9,800 ൽ കൂടാത്ത ജനസംഖ്യ. ഇതിൽ 22% മുതവർ, മന്നാൻ, അരയൻ എന്നീ ആദിവാസികളാണ്.

മാങ്കുളം പഞ്ചായത്തിന് ഒട്ടേറെ പ്രത്യേകതകളുണ്ട്. മൂന്ന് വ്യത്യസ്ത കാലാവസ്ഥകൾ ഇവിടെ അനുഭവപ്പെടുന്നു. വിരിപാറയിൽ മൂന്നാറിനു സമമായ കാലാവസ്ഥയാണ്. മാങ്കുളത്ത് മിത ശിതോഷണം. ആനക്കുളത്ത് കേരളത്തിലെ പൊതുവായ കാലാവസ്ഥ (എകദേശം 40° വരെ ചൂട് അനുഭവപ്പെടാറുണ്ടിവിടെ). സ്വന്തമായി വൈദ്യുതി ഉത്പാദിപ്പിച്ച് വിതരണം ചെയ്ത (മേനാച്ചേരിയാറിലെ മാങ്കുളം ചെറുകിട ജലവൈദ്യുത പദ്ധതി) ഇന്ത്യയിലെ ആദ്യ പഞ്ചായത്താണിത്. ഉപയോഗം കഴിഞ്ഞ് മിച്ചമായത് യൂണിറ്റിന് 4.58 രൂപ നിരക്കിൽ വൈദ്യുതി വകുപ്പിനു വിൽപ്പന നടത്തുന്നുമുണ്ടിവിടെ. ഇന്ത്യയിലെ ആദ്യത്തെ സർട്ടിഫൈഡ് ഓർഗാനിക് വില്ലേജ് (Inter National Organic Standards പ്രകാരം) ആയ മാങ്കുളം പശ്ചിമഘട്ടത്തിൽ UN അടയാളപ്പെടുത്തിയിട്ടുള്ള അതീവ ലോലമായ ജൈവ വൈവിധ്യമേഖലകളിൽ പ്രധാനപ്പെട്ടതുമാണ്.

മേനാച്ചേരിയാറ് (മാങ്കുളം പുഴ), നല്ലതണ്ണിപ്പുഴ, കരിന്തിരിപ്പുഴ എന്നിവയാണ് ഇതിലൂടെയൊഴുകുന്ന പ്രധാന നദികൾ. മേനാച്ചേരിയാറിൽ മാത്രം അഞ്ചു വെള്ളച്ചാട്ടങ്ങളുണ്ട്. വിരിപാറ, കോഴിവാലൻ കുത്ത്, പെരുമ്പൻ കുത്ത്, നക്ഷത്രകുത്ത്, ചിന്നാർക്കുത്ത് എന്നിവയാണവ. മലമുകളിൽ നിന്നു നൂറോളം മീറ്റർ താഴോട്ട് പതിക്കുന്ന ചിന്നാർക്കുത്തിനടുത്ത് എത്തെണമെങ്കിൽ കൊടുംകാട്ടിനുള്ളിലൂടെ സാഹസികയാത്ര നടത്തണം. മാങ്കുളം ടൗണിൽ നിന്നും നോക്കിയാൽ ഇതിന്റെ ദൂരക്കാഴ്ച കാണാം. കോഴിവാലൻ കുത്ത് വെള്ളച്ചാട്ടമാണിതിൽ വലുത്. ഒരു കി.മീ. കുത്തനെയുള്ള കയറ്റം കയറിവേണം ഇവിടെയെത്താൻ.

ശർക്കരയും സുർക്കയും ചേർത്തു ബ്രിട്ടീഷുകാർ നിർമ്മിച്ച പെരുമ്പൻ കുത്തു പാലമാണ് മറ്റൊരാകർഷണം. 1800 ലാണ് ഇതിന്റ നിർമ്മിതി. 1924 ലെ പ്രളയത്തെ അതിജീവിച്ച ഈ പാലം സമീപകാലത്തെ പ്രളയങ്ങളെയും വകവെയ്ക്കാതെ പ്രൗഢമായി നിൽക്കുന്നു. ഈ പാലത്തിലൂടെയുള്ള യാത്ര വേറിട്ടൊരു അനുഭവമാണ്. ഞങ്ങളുടെ ഉച്ച ഭക്ഷണം ഈ പാലത്തിനു ചുവട്ടിലെ പാറക്കെട്ടിലായിരുന്നു. ഈ പാലത്തിന്റെ തൊട്ടുതാഴെയാണ് പെരുമ്പൻ കുത്ത് വെള്ളച്ചാട്ടം. കോഴിവാലൻ കുത്ത് വെള്ളച്ചാട്ടം 2 കിലോമീറ്റർ മുകളിലും. മേനാച്ചേരിയാറിലെ സ്ഫടികസമാനമായ ജലപ്രവാഹത്തെ കീറിമുറിച്ചു കൊണ്ടുള്ള ജീപ്പുയാത്ര സാഹസികത ഇഷ്ടപ്പെടുന്നവർക്കു മറക്കാനാവാത്ത ഒരു അനുഭവമാണ്.

മാങ്കുളത്തെ മറ്റൊരാകർഷണമാണ് കുറത്തിക്കുടി ആദിവാസി കോളനിയിലേക്കുള്ള യാത്ര. പെരുമ്പൻ കുത്ത്പാലത്തിൽ നിന്നും 4 കിലോ മീറ്റർ കൊടും കാടിനുള്ളിലൂടെ യാത്ര ചെയ്തുവേണം കോളനിയിൽ എത്താൻ. ഈ യാത്രയുടെ തുടക്കത്തിൽ തന്നെ മേനാച്ചേരിയാറിലെ പെരുമ്പൻ കുത്ത് വെള്ളച്ചാട്ടം കാണാം. ദുർഘടമായ വഴിയിലൂടെ ചീവിടുകളുടെ കാതടപ്പിക്കുന്ന മൂളിച്ചയുടെ അകമ്പടിയോടുയാണു യാത്ര. പലയിടത്തും കാട്ടാനകൾ ചവിട്ടിമെതിച്ച ഈറ്റക്കാടുകളും കാണാൻ കഴിയും.

മാങ്കുളം ഫോറസ്റ്റ് ഡിവിഷനിൽ നിന്നൊഴുകി വരുന്ന ഒരു നീരൊഴുക്ക് 1986-ൽ 33 കുടുംബങ്ങൾക്ക് പട്ടയം പതിച്ചു കൊടുത്ത ഭാഗത്തുണ്ട്. ഈ വെള്ളച്ചാട്ടം 33 വെള്ളച്ചാട്ടം എന്ന പേരിൽ അറിയപ്പെടുന്നു. ഇവിടെ സഞ്ചാരികൾക്ക് റോഡുമാർഗ്ഗം എളുപ്പം ചെന്നെത്താം. കുട്ടികൾക്ക് പോലും സുരക്ഷിതമായി ഇറങ്ങി കുളിക്കുവാൻ കഴിയുന്ന ഇടമാണിത്. നിർമ്മലമായ ജലപ്രവാഹത്തിന്റെ പരുശുദ്ധി അനുഭവിച്ചു മാത്രം അറിയേണ്ടതാണ്.

ആനക്കുളത്തു നിന്നും കോഴിയിളക്കുടിക്കു പോകുന്ന വഴിയിൽ 2 കി.മീ. അകലെയായി ഈറ്റാച്ചാലുക്കുത്തിൽ ഒരു ചെക്ക് ഡാം ഉണ്ട്. കൊടും കാടിനുള്ളിൽ നിന്നും ഒഴുകി വരുന്ന സ്ഫടിക സമാനമായ ജലത്തിൽ സഞ്ചാരികൾക്ക് മതിയാവോളം നീരാടാനും മുങ്ങികുളിക്കാനുമുള്ള സൗകര്യമുണ്ട്. സഞ്ചാരികളാരും അസുലഭമായ ഈ അവസരം ആസ്വദിക്കാതെ കടന്നു പോകാറില്ല. ഈ തെളിഞ്ഞ തണുത്ത വെള്ളത്തിലെ കളിയും കുളിയും മനസിനും ശരീരത്തിനും പകരുന്ന ഊർജ്ജം ചെറുതല്ല. ഈ യാത്രയിൽ കഴിഞ്ഞ പ്രളയത്തിൽ തകർന്ന റോഡും തൂക്കുപാലവും വീടുകളും കാണാൻ കഴിഞ്ഞു.

രാജമലയിൽ നിന്നും ഉത്ഭവിച്ചു നിബിഡവനത്തിലൂടെ ഒഴുകി വരുന്നതാണ് നല്ലതണ്ണിപ്പുഴ. ഈ രണ്ടു തെളി നീരരുവികളയും ചേർത്ത് പിടിച്ച് നല്ലതണ്ണിപ്പുഴ ആനക്കുളത്ത് എത്തുന്നു. ആദിവാസികൾ നട്ടുവളർത്തുന്ന ഈറ്റക്കാടുകളിലൂടെ ഒഴുകി വരുന്ന ഈ പുഴയെ ഇവുടുത്തുകാർ ഈറ്റച്ചോലയാറെന്നും വിളിക്കുന്നു. യാതൊരു ഭയപ്പാടും കൂടാതെ കാട്ടാനകൾ കൂട്ടത്തോടെ വെള്ളം കുട്ടിക്കാനെത്തുന്ന ഇടമാണിത്. സഞ്ചാരികൾക്ക് ഏറ്റവും അടുത്തുനിന്ന് സ്വതന്ത്രമായ കാട്ടാനക്കൂട്ടത്തെ കണ്ടാസ്വദിയ്ക്കാം. ഇത്രയടുത്ത് കാട്ടനാകളെ കാണാനുള്ള സൗകര്യം കേരളത്തിൽ മറ്റെവിടെയുമില്ല.

ഇവിടുത്തെ വെള്ളത്തിന് ഉപ്പുരസമുണ്ട്, ധാരളം ധാതുക്കൾ അലിഞ്ഞു ചേർന്നിട്ടുമുണ്ട്. ഈ വെള്ളം കുടിച്ച് മത്തു പിടിക്കുന്ന ആനകൾ രാത്രിയിൽ ടൗണിലേയ്ക്കു കയറുമെങ്കിലും നാശനഷ്ടങ്ങൾ ഉണ്ടാക്കാറില്ല. ചില ദിവസങ്ങളിൽ 80 ആനകൾ വരെ വെള്ളം കുടിക്കാൻ എത്താറുണ്ടെന്നാണു അറിഞ്ഞത്. വളരെ ചുരുക്കം ദിവസങ്ങിളിലേ ആനക്കൂട്ടം സഞ്ചാരികളെ നിരാശപ്പെടുത്താറുള്ളൂ. രാത്രി 7.30 വരെ ആനക്കൂട്ടത്തെ കാത്തിരുന്ന ഞങ്ങൾ നിരാശരായി മടങ്ങി.

കള്ളക്കുട്ടിയിൽ വെച്ച് കരിന്തിരിപ്പുഴ കൂടെ നല്ലതണ്ണിപ്പുഴയിൽ ചേരുന്നതോടെ കുട്ടമ്പുഴ രൂപം കൊള്ളുന്നു. ഇടമലയാർ ജലവൈദ്യുതപദ്ധതി ഈ നദിയിലാണ്. കേരള ടൂറിസം മാപ്പിൽ ഇടം പിടിക്കാൻ മാങ്കുളം ഒരുങ്ങിക്കഴിഞ്ഞു. മാങ്കുളം വനം വകുപ്പ് വിവിധമേഖലകളിലേയ്ക്ക് ട്രക്കിംഗ് സൗകര്യം ഏർപ്പെടുത്തിയിട്ടുണ്ട്. പുലിമട യാത്ര, കണ്ണാടിപ്പാറ ട്രക്കിംഗ്, നക്ഷത്രപ്പാറ ട്രക്കിംഗ് തുടങ്ങിയവ അതിൽ ചിലതു മാത്രം. ഇതുകൂടാതെ മാങ്കുളം ഗ്രാമപഞ്ചായത്തുമായി സഹകരിച്ച് ഒരു സൊസെറ്റിയും സഞ്ചാരികൾക്കായി കുറഞ്ഞ ചെലവിൽ പ്രകൃതിയുടെ നൈസർഗിക സൗന്ദര്യം ആസ്വദിക്കാനുള്ള സൗകര്യം ഏർപ്പെടുത്തിയിട്ടുണ്ട്.

അടിമാലി മൂന്നാർ റൂട്ടിൽ കല്ലാറിൽനിന്നും ഇടത്തോട്ട് തിരിഞ്ഞ് 16 കിലോമീറ്റർ സഞ്ചരിച്ചാൽ മാങ്കുളത്തെത്തിച്ചേരാം. മൂന്നാറിൽ നിന്നും നേരിട്ടുവരുന്നവർക്ക് 18 കിലോമിറ്ററാണ് ദൂരം. മാങ്കുളത്തു നിന്നും 8 കിലോ മീറ്റർ അകലെയാണ് ആനക്കുളം. വിവിധ ഭാഗങ്ങളിൽ നിന്നുമായി 7 സർക്കാർബസുകളും 8 സ്വകാര്യ ബസുകളും ആനക്കുളത്തേയ്ക്കു സർവ്വീസ് നടത്തുന്നുണ്ട്.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

You May Also Like

ഓൺലൈൻ തട്ടിപ്പ് നടത്താനൊരുങ്ങിയ മദാമ്മയ്ക്ക് തിരിച്ചു പണികൊടുത്ത് മലയാളി

തട്ടിപ്പുകാർ പലവിധത്തിലുണ്ടെങ്കിലും, ഇപ്പോൾ കൂടുതലും തട്ടിപ്പുകൾ നടക്കുന്നത് ഓൺലൈനിലൂടെയാണ്. ആർക്കും ഒരു സംശയവും തോന്നാതെ പറ്റിക്കാൻ മിടുക്കരായ ഇവരുടെ വലയിൽ പലരും വീണിട്ടുമുണ്ട്. ഇത്തരത്തിലൊരു ഉഗ്രൻ തട്ടിപ്പുകാരിയെ മനസ്സിലാക്കി തിരിച്ചു പണികൊടുത്ത കഥയാണ് കോഴിക്കോട് കുന്നമംഗലം സ്വദേശിയും, സാമൂഹിക പ്രവർത്തകനും, ശില്പിയുമായ…
View Post

എനിക്കും പണികിട്ടി !!! മെസ്സേജുകൾ പോയത് പാകിസ്താനിലേക്കും തായ്‌വാനിലേക്കും

എഴുത്ത് – അജ്മൽ അലി പാലേരി. ഇന്നലെ രാവിലെ മുതൽ എന്റെ ഫോണിന് എന്തോ ഒരു പ്രശ്നം ഉള്ളതായി തോന്നിയിരുന്നെങ്കിലും പെരുന്നാൾദിനത്തിലെ തിരക്കുകൾ കാരണം കൂടുതൽ ശ്രെദ്ധിക്കാൻ കഴിഞ്ഞിരുന്നില്ല. ഫോണ് സ്ലോ ആയതിനോടൊപ്പം ഫോട്ടോ എടുക്കാൻ ക്യാമറ ആപ്ലിക്കേഷൻ ഓപ്പൺ ചെയ്യുമ്പോഴും,…
View Post

മണാലി ബസ് സ്റ്റാൻഡിൽ ഒരു മലയാളിയെ പറ്റിച്ചു മുങ്ങിയ മലയാളി

വിവരണം – Zainudheen Kololamba. അപരിചിതമായ വഴികളിൽ കണ്ടുമുട്ടുന്ന മലയാളികളെ ബന്ധുക്കളേക്കാൾ സ്വന്തമാണെന്ന് തോന്നാറില്ലേ? ഹിന്ദി, ഉറുദു കലപിലകൾക്കിടയിൽ ആരെങ്കിലും വന്ന് മലയാളിയാണോ എന്ന് ചോദിക്കുമ്പോൾ അത്യാനന്ദം അനുഭവപ്പെടാറില്ലേ? തീർച്ചയായും എനിക്ക് തോന്നാറുണ്ട്. കേരള സമ്പർക്രാന്തിയുടെ സെക്കന്റ് ക്ലാസ് ഡബ്ബയുടെ ബർത്തിലിരുന്ന്…
View Post

അച്ഛനോടൊപ്പം ഞാൻ കണ്ട ഊട്ടി; ഇനിയൊരിക്കലും നടക്കാത്ത ആ യാത്ര

വിവരണം – ശുഭ ചെറിയത്ത്. യാത്രയെക്കുറിച്ച് ചിന്തിക്കുമ്പോൾ മനസ്സിൽ ആദ്യം ഓടിയെത്തുക നാം നടത്തിയ ആദ്യ യാത്ര ആയിരിക്കും. ഓർമയിലെ ആദ്യയാത്ര … ചിലർക്കത് കുടുംബത്തോടൊപ്പമാകാം , ചിലർക്ക് സുഹൃത്തുക്കളോടൊപ്പമാകാം അതുമല്ലെങ്കിൽ സ്ക്കൂൾ വിനോദയാത്രയാകാം … ആ യാത്രയുടെ ബഹിർസ്ഫുരണം പിന്നീടുള്ള…
View Post

മൂന്നാറിൻ്റെ തലവര മാറ്റാൻ ‘എസ്കേപ്പ് റോഡ്’

എഴുത്ത് – ദയാൽ കരുണാകരൻ. ഇപ്പോൾ കൊടൈക്കനാലും മൂന്നാറും തമ്മിലുള്ള യാത്രാ അകലം വാസ്തവത്തിൽ വെറും 13 കിലോമീറ്ററാണ്. കൊടൈക്കനാലിന്റ്റെ തെക്കുപടിഞ്ഞാറ് ഭാഗത്തുള്ള ടൂറിസ്റ്റ് സ്പോട്ടാണ് ബെരിജം തടാകം. ദിവസവും ഇവിടേക്ക് നിശ്ചിത എണ്ണം സന്ദർശ്ശകരുടെ വാഹനങ്ങൾ കടത്തി വിടുന്നുമുണ്ട്. ഇനി…
View Post

1000 രൂപയ്ക്ക് താമസമടക്കം ‘മൂന്നാർ’ ടൂർ പാക്കേജുമായി കെഎസ്ആർടിസി

കേരളത്തിൽ ഏറ്റവും കൂടുതൽ വിനോദസഞ്ചാരികൾ വരുന്ന സ്ഥലങ്ങളിലൊന്നാണ് ഇടുക്കി ജില്ലയിലെ മൂന്നാർ. വിശാലമായ തേയിലത്തോട്ടങ്ങള്‍, മനോഹരമായ ചെറു പട്ടണങ്ങള്‍, വളഞ്ഞുയര്‍ന്നും താഴ്ന്നും പോവുന്ന പാതകള്‍, അവധി ആഘോഷത്തിന് യോജിച്ച സൗകര്യങ്ങള്‍, തണുത്ത കാലാവസ്ഥ, പുൽമേടുകൾ, ഷോലക്കാടുകൾ തുടങ്ങിയ ഘടകങ്ങളാണ് മൂന്നാറിന്റെ പ്രകൃതഭംഗിയ്ക്ക്…
View Post

ജനമൈത്രി പോലീസിനൊപ്പം പൂയംകുട്ടി വനത്തിലേക്ക്

വിവരണം – അരുൺ കളപ്പില. ശ്വാസം അടക്കിപ്പിടിച്ചനുഭവിച്ച അതി കഠിനമായൊരു വനയാത്രയാണിത്. ആനച്ചൂരിൽ, ഇരുണ്ട കാട്ടിലൂടെ കടന്നുപോകുമ്പോൾ നാമറിയാതെ അനുഭവിക്കുന്ന ഒരു ലഹരിയുണ്ട്. അതാണീ യാത്രയുടെ ജീവൻ. കാടിനെ സ്നേഹിക്കുന്ന ഓരോ മനുഷ്യന്റേയും ആഗ്രഹമാണ്, കാടിനെ നോവിക്കാതെ നിശബ്ദമായി മരങ്ങളെ, പക്ഷികളെ,…
View Post

പെട്രോൾ പമ്പുകളിൽ മലയാളികൾ പറ്റിക്കപ്പെടുന്നത് ഇങ്ങനെ – ഒരു ടാക്സി ഡ്രൈവറുടെ അനുഭവക്കുറിപ്പ്…

അന്യസംസ്ഥാനങ്ങളിലേക്കൊക്കെ സ്വന്തം വാഹനങ്ങളുമായി പോകാറുള്ളവരാണല്ലോ നമ്മളൊക്കെ. യാത്രയ്ക്കിടയിൽ കേരളത്തിനു പുറത്തു വെച്ച് വണ്ടിയിൽ ഇന്ധനം കുറഞ്ഞുപോയാൽ നമ്മൾ സാധാരണ ചെയ്യാറുള്ളതു പോലെ അടുത്തുള്ള പമ്പിൽ കയറി ഇന്ധനം നിറയ്ക്കുകയും ചെയ്യും. എന്നാൽ ഇത്തരത്തിൽ ഇന്ധനം നിറയ്ക്കുവാൻ പമ്പിൽ ചെല്ലുന്നവർ തങ്ങൾ കബളിപ്പിക്കപ്പെടുന്ന…
View Post

എറണാകുളം ജില്ലയിലെ ഏറ്റവും ഉയർന്നതും കൊടുംകാട്ടിലൂടെയുമുള്ള ബസ് റൂട്ട്

‘കോതമംഗലം – കുട്ടമ്പുഴ – മാമലക്കണ്ടം’ : എറണാകുളം ജില്ലയിലുള്ള കോതമംഗലം കെഎസ്ആർടിസി ഡിപ്പോയിലെ ഏറ്റവും പ്രയാസവും, എന്നാൽ ഏറ്റവും മനോഹരവുമായ പ്രദേശത്തേക്കുള്ള ബസ് റൂട്ടാണിത്. കാട്ടാനകൾ ധാരാളമുള്ള വനത്തിലൂടെ ഒരു ബസിനു മാത്രം പോകാൻ കഴിയുന്ന റോഡ്, പോകും വഴിയേ…
View Post