രുചിയുടെ തലയെടുപ്പ് കൊണ്ട് വ്യത്യസ്തമായ കുളവിക്കോണം ചന്തു ഹോട്ടൽ

Total
0
Shares

വിവരണം – Vishnu A S Pragati.

രുചിയിടങ്ങൾ തേടിയുള്ള അലച്ചിലനിടയിൽ നമ്മുടെ അനുഭവം കൊണ്ട് മറക്കാനാകാത്ത ചിലതുണ്ട്. ചിലപ്പോൾ രുചിയുടെ തലയെടുപ്പ് കൊണ്ടും മറ്റു ചിലപ്പോൾ വ്യത്യസ്തത കൊണ്ടും ഇനി അതുമല്ലെങ്കിൽ വിളമ്പുന്നതിനെക്കാൾ കൂടുതൽ ഊട്ടാനുള്ള ചിലരുടെ കാലം പഴക്കമേറ്റിയ നര വീണ വ്യഗ്രതും അതിനുള്ളിലെ സ്നേഹവും കരുതലും പിന്നെ ആഹാരത്തിനോടുള്ള നേരും നെറിയും കൊണ്ടാകും. അങ്ങനെ ഞാൻ കണ്ടിട്ടുള്ള ചുരുക്കം ചില ഭക്ഷണശാലകളിൽ ഒന്നാണ് കുളവിക്കോണം ചന്തു ഹോട്ടൽ.

നെടുമങ്ങാട് ചന്തമുക്ക് ജംഗ്ഷനിൽ നിന്നും വേണാട് ആശുപത്രി പോകുന്ന വഴിക്ക് മുമ്പേയാണ് കുളവിക്കോണം എന്ന സ്ഥലം. കുളവിക്കോണം ജംഗ്ഷനിൽ നിന്നും സുമാർ ഒരു 200 മീറ്റർ പോയാൽ വലതു വശത്തായാണ് ചന്തു ഹോട്ടൽ. ഹോട്ടൽ ഇതാണെങ്കിലും ഹോട്ടൽ കഴിഞ്ഞു ഒരു 10 മീറ്റർ മുന്പിലായി ക്രിസ്ത്യൻ പള്ളിയിലേക്ക് കയറുന്ന കുത്തനെയൊരു കയറ്റമുണ്ട്, ആ കയറ്റത്തിന്റെ ഏതാണ്ട് ഒടുവിലായി വലതു വശത്ത് ഒരു ഓലപ്പുര കാണാം.. അതാണ് ചന്തു ഹോട്ടലിന്റെ മൂലസ്ഥാനം..

നല്ല അത്യുജ്വലമായ നാടൻ ഊണാണ് കാലിടറുന്ന നാല് ഡെസ്കും കസേരകളും ഓലപ്പുരയുടെ ആമ്പിയൻസുമുള്ള ഈ രുചിയിടത്തിന്റെ ഓഫർ. നേരെ ചെന്നു കയറുക ഫാനും ഏസിയും ഒരു കുടചക്രവുമില്ലെങ്കിലും ലവലേശം ചൂടറിയാത്ത ഓലമാടത്തിനുള്ളിലെ കസേരയിൽ കാലുകൾ താളത്തിലാട്ടിലാട്ടിയൊരു ഊണ് പറയുക. പറയേണ്ട താമസം ക്ഷണനേരം വൈകാതെ കഴുകി ഈർപ്പം മാറാത്തൊരു വാഴയില മുന്നിലേക്ക് വീഴും പിന്നെയാണ് തൊടുകറികളും കിടുപിടികളും വരിവരിയായി വരുന്നത്..

കരിമ്പനയുടെ ഇളംകൂമ്പ് വാട്ടിപ്പിഴിഞ്ഞ നീരും ആട്ടിൻപാലും ചേർത്താണ് ആയുധമൂട്ടാൻ വടക്കൻ പാട്ടിലെ ചന്തു പെരുംകൊല്ലനോട് പറഞ്ഞതെങ്കിൽ നല്ല ഇരുത്തം വന്ന വീട്ടിലിട്ട അച്ചാറും അനല്പമായ രുചിപേറുന്ന ബീൻസ് തോരനും ചെറുപയറും ഏത്തയ്ക്കയും വിരൽ വണ്ണത്തിൽ അരിഞ്ഞിട്ട കാരറ്റും കൂടിച്ചേർന്ന് അസാധ്യ രുചിപേറുന്ന ഒടച്ചുകറിയും. പിന്നെ കൂട്ടിനായി നെടുമങ്ങാടിന്റെ സ്വന്തം ഉഗോഗ്രൻ മരിച്ചീനിയും നല്ല കിടുക്കാച്ചി മീൻകറിയും..

ഇത്രയും പേരെ ഇലയിലേക്ക് സ്വാഗതം ചെയ്തു കഴിഞ്ഞാൽ മുല്ലമൊട്ടിനെ വെല്ലുന്ന വെണ്മയോട് കൂടിയ ആവി പറപ്പിക്കുന്ന ചോറിന്റെ വരവാണ്. കൂടെ പരിപ്പ് അരച്ചുണ്ടാക്കിയ നല്ല ഒന്നാംതരം പരിപ്പ്കറിയും. എല്ലാം പക്കാ വീട്ടിലുണ്ടാക്കിയ പോലത്തെ നിറവും മണവും കൊഴുപ്പും. മീനിന്റെ മുഷിടില്ലാതെ തിരുവനന്തപുരത്തുകാർക്ക് എന്ത് ഊണ്? വരട്ടെ. ചൂര ഒന്ന്.. പാര ഒന്ന്..

“സാധനം വാങ്ങിക്കുന്നതൊക്കെ കൊള്ളാം വല്ലതും മിച്ചം വച്ചാലാണ് ഇരിക്കണത്.” വിളമ്പിക്കൊണ്ടിരുന്നപ്പോൾ കടയുടെ ഉടമയായ ചന്തു മാമന്റെ ഉത്തരവ്. മിച്ചം വയ്ക്കരുതെന്ന്.. അതും എന്നോട്.

ചില ഹോട്ടലുകളിലെ പരിപ്പ് കറിയുണ്ട്. ചോർ കുഴികുത്തി ഒഴിച്ചാൽ നെയ്യാർ പോലെ ഒഴുകി പരക്കുന്ന ഒളപ്പാസ് പരിപ്പുകറി. അതിൽ നിന്നും നിന്നും തീർത്തും വ്യത്യസ്തമായി നല്ല കിടുക്കാച്ചി പരിപ്പുകറിയാണ് ഇവിടുത്തേത്. പരിപ്പുകറിയൊഴിച്ചു അറുമാദിച്ച ചോറിൽ പപ്പടം പൊട്ടിച്ചിട്ടു വെരവി തൊട്ടാൽ പൂഞ്ഞിങ്ങു പോരുന്ന ചൂരയുടെ ഒരു കഷ്ണവും ഉള്ളിൽ വച്ചു കഴിക്കണം. വെറും വിജ്രംഭിച്ച കിടുക്കാച്ചി.

ചൂടിൽ അലഞ്ഞു തിരിഞ്ഞ് പൈദാഹങ്ങളോടെ വയറ് കാഞ്ഞു തുടങ്ങുന്ന നേരം ചെറുചൂടോടെ ഇവിടുത്തെ ഊണും ഉപ്പിട്ട കഞ്ഞി വെള്ളവും വേറെ ലെവലാണ്. പറഞ്ഞറിയിക്കാൻ വയ്യ. ശേഷം വന്ന സാമ്പാർ അത്യുഗ്രൻ, അനിതരസാധാരണമായ രുചിയോട് കൂടിയ പുളിശ്ശേരി, കിണ്ണം കാച്ചിയ രസം, ഉഗ്രൻ മോര് എന്നിങ്ങനെ ഓരോന്നിന്റെ ഒപ്പവും ആദ്യം വാങ്ങിയ അതേ അളവിൽ ചോറ്.. പക അത് വീട്ടാനുള്ളതാണ്.

ഏറ്റവും ഒടുവിൽ കഴിച്ച ഇലയിൽ തന്നെ വെന്തുടഞ്ഞ ആ കിടിലം മരിച്ചീനിയിൽ തക്കാളിയും പച്ചമാങ്ങയും തേങ്ങയും അരച്ച അപ്രാപ്യ രുചിയോട് കൂടിയുള്ള മീൻ കറി ഒഴിച്ചു കുഴച്ചു കഴിക്കണം. ആ ഒരൊറ്റ കഷ്ണം മീനിന്റെ രുചി വെറും അത്യുജ്വലം. മീൻ കറിയുടെ ഇടയിൽ കിട്ടിയ തക്കാളിയും അത്യപൂർവ്വമായി കിട്ടുന്ന പച്ചമാങ്ങയും എന്താ രുചി.. വെറും കിടിലം.

പെരുവിരലും ചൂണ്ടുവിരലും കൊണ്ട്‌ അർദ്ധചന്ദ്രാകൃതിയിൽ കളം വരച്ചു പൊട്ടും പൊടിയും വടിച്ചു ഇല വൃത്തിയാക്കിയ ശേഷം മിച്ചം വന്ന കഞ്ഞിവെള്ളം കുടിച്ചോണ്ട് തകർപ്പനൊരു ഏമ്പക്കം.. ആഹാ.. അന്തസ്സ്… വയറും മനസ്സും നിറച്ചൊരു ഊണും കഴിഞ്ഞ് ഇല മുന്നിലോട്ട് മടക്കിയെടുത്ത് കൈകഴുകി വന്നപ്പോഴാണ് കടയുടെ നടയിൽ നാരങ്ങാ മുട്ടായി കണ്ടത്.. വിട്ടില്ല, വാങ്ങി അതും ഒരു പത്തെണ്ണം. ഊണു കഴിച്ചു വയറ് നിറഞ്ഞാൽ ആ കിക്കൊന്നു മാറാൻ ഒരൽപ്പം മധുരം അതൊരു നിർബന്ധമാണ്.

വീട്ടിലെ ഊണെന്നൊക്കെ പറഞ്ഞാൽ പക്കാ വീട്ടിലെ ഊണും രുചിയും .. വലിയ വലിയ ഹോട്ടലിൽ പോയാലും ഈ രുചി കിട്ടുമോയെന്ന കാര്യം തുലോം സംശയമാണ്. സത്യം… ചന്തു ചതിച്ചില്ല. വിലവിവരം : ഊണ് + മീൻ കറി + മീൻ പൊരിച്ചത് – 90 Rs, എക്സ്ട്രാ മീൻ പൊരിച്ചത് 30 Rs.

സപ്തതിയുടെ നിറവിൽ നിൽക്കുന്ന ചന്ദ്രസേനൻ നായർ അഥവാ ചന്തു മാമനാണ് ചന്തു ഹോട്ടലിന്റെ അമരക്കാരൻ. ഏതാണ്ട് 20 വർഷത്തോളമായി ഈ കട നടത്തിക്കൊണ്ട് പോകുന്നു. ആദ്യ കാലങ്ങളിൽ കുറച്ചു കച്ചവടങ്ങളും ‘അൽഗുൽത്ത്’ പരിപാടികളുമായാണ് മുന്നോട്ട് പോയതെങ്കിലും പിന്നീട് ഒരു ഭക്ഷണശാലയിലേക്ക് ജീവിതം വഴിമാറ്റി വിടുകയായിരുന്നു ചന്തു മാമൻ. മക്കളെയെല്ലാം പഠിപ്പിച്ചു നല്ല നിലയിലാക്കി, അവർക്കൊക്കെ ജോലിയും ലഭിച്ചു. എന്നിരുന്നാലും ഒരു ബോഞ്ചി വെള്ളത്തിന് പോലും ആരുടെയും മുന്നിൽ കൈനീട്ടാൻ വയ്യെന്ന കാർക്കശ്യമാണ് എപ്പോഴും ചന്തു ഹോട്ടലിന്റെ നിലനിൽപ്പിന്റെ ആധാരം.

കടയിലേക്കുള്ള വിഭവങ്ങളെല്ലാം ഉണ്ടാക്കുന്നത് തൊട്ടടുത്തുള്ള വീട്ടിൽ തന്നെയാണ്. വിളമ്പും മറ്റ് കാര്യവട്ടങ്ങളെല്ലാം ചന്തു മാമന്റെ നേതൃത്വത്തിലാണ്. ഈ പ്രായത്തിലും എന്താ ഊർജ്ജസ്വലത. മീൻ രാവിലെ നെടുമങ്ങാട് ചന്തയിൽ നിന്നും വാങ്ങും നല്ലത് കിട്ടിയില്ലെങ്കിൽ മാത്രം അപൂർവ്വമായി ബീഫും ഉണ്ടാക്കാറുണ്ട്..

ആഹാരം വിളമ്പുക എന്നതിലുപരി അത് ഊട്ടുക എന്നതിനും മുൻഗണന കൊടുക്കുന്ന വ്യക്തിയാണ് ചന്തു മാമൻ. നിറഞ്ഞ ചിരിയോടെയാണ് വിളമ്പ്. പക്ഷെ ഒറ്റ നിബന്ധന ഇലയിൽ വാങ്ങിയത് കഴിക്കാതെ എഴുന്നേൽക്കാൻ പാടില്ല. അങ്ങനെ ചെയ്താൽ കണ്ണുപൊട്ടുന്ന വഴക്ക് പറയും. അതിപ്പോൾ പ്രായം കൊണ്ടായാലും സ്ഥാനം കൊണ്ടായാലും എത്ര വലിയവനായാലും ശെരി.

അതൊക്കെ ഒരു തരത്തിൽ സ്നേഹമാണ്. വിളമ്പുന്ന അന്നത്തിനോടുള്ള സ്നേഹം. ഇങ്ങനെ സ്നേഹിക്കുന്നവരും നമുക്കിടയിലുണ്ട്. അറിയണം അറിയാതെ പോകരുത്. അതൊക്കെ കൊണ്ടാകും നാട്ടുകാരും ചന്തയിൽ കച്ചവടത്തിന് വരുന്നവരും നെടുമങ്ങാട് ഗവർണമെന്റ് സ്ഥാപനങ്ങളിലെ ഉദ്യോഗസ്ഥവൃന്ദവും കൂട്ടരുമായി പറയാൻ ആരുമില്ലാത്ത ഈ ഓല മാടത്തിലെ രുചി തേടി വരുന്നത്. അറിയണം, അറിഞ്ഞേ പറ്റൂ.

നല്ല ഒന്നാംതരം ഊണ്. അത് ചന്തു ചതിക്കാതെ വിളമ്പും. അത് ഡെഫിനിറ്റാ. താഴെ കൂടുതൽ സൗകര്യങ്ങളോടെ, അതേ വിഭവങ്ങളോടെ ചന്തു ഹോട്ടൽ ഉണ്ടെങ്കിലും ഈ ഓലപ്പുരയിലിരുന്നു കഴിക്കുന്നതിന്റെ സുഖം അതൊന്നു വേറെ തന്നെയാണ്. ഉച്ചയ്ക്ക് 12.00 – 12.30 യോടെ ഊണ് തുടങ്ങും. ചോർ തീരുമ്പോൾ നിർത്തും. അത്ര തന്നെ.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

You May Also Like

ഓൺലൈൻ തട്ടിപ്പ് നടത്താനൊരുങ്ങിയ മദാമ്മയ്ക്ക് തിരിച്ചു പണികൊടുത്ത് മലയാളി

തട്ടിപ്പുകാർ പലവിധത്തിലുണ്ടെങ്കിലും, ഇപ്പോൾ കൂടുതലും തട്ടിപ്പുകൾ നടക്കുന്നത് ഓൺലൈനിലൂടെയാണ്. ആർക്കും ഒരു സംശയവും തോന്നാതെ പറ്റിക്കാൻ മിടുക്കരായ ഇവരുടെ വലയിൽ പലരും വീണിട്ടുമുണ്ട്. ഇത്തരത്തിലൊരു ഉഗ്രൻ തട്ടിപ്പുകാരിയെ മനസ്സിലാക്കി തിരിച്ചു പണികൊടുത്ത കഥയാണ് കോഴിക്കോട് കുന്നമംഗലം സ്വദേശിയും, സാമൂഹിക പ്രവർത്തകനും, ശില്പിയുമായ…
View Post

ജനമൈത്രി പോലീസിനൊപ്പം പൂയംകുട്ടി വനത്തിലേക്ക്

വിവരണം – അരുൺ കളപ്പില. ശ്വാസം അടക്കിപ്പിടിച്ചനുഭവിച്ച അതി കഠിനമായൊരു വനയാത്രയാണിത്. ആനച്ചൂരിൽ, ഇരുണ്ട കാട്ടിലൂടെ കടന്നുപോകുമ്പോൾ നാമറിയാതെ അനുഭവിക്കുന്ന ഒരു ലഹരിയുണ്ട്. അതാണീ യാത്രയുടെ ജീവൻ. കാടിനെ സ്നേഹിക്കുന്ന ഓരോ മനുഷ്യന്റേയും ആഗ്രഹമാണ്, കാടിനെ നോവിക്കാതെ നിശബ്ദമായി മരങ്ങളെ, പക്ഷികളെ,…
View Post

മുഖം മിനുക്കി കളർഫുള്ളായി നമ്മുടെ സ്വന്തം കോഴിക്കോട് ബീച്ച്

കോഴിക്കോടിനെ കുറിച്ച് ചിന്തിക്കുമ്പോൾ നമ്മുടെ മനസ്സിലേക്ക് ഓടിയെത്തുന്ന ചിത്രങ്ങളാണ് കോഴിക്കോട് ബീച്ചും മിഠായിതെരുവും മാനാഞ്ചിറയും കുറ്റിച്ചിറയും തളിയുമെല്ലാം. ഒരു സഞ്ചാരി എന്ന നിലയിൽ ഇവയുടെയൊക്കെ മനോഹാരിത എന്നും ഒരുപാട് സന്തോഷിപ്പിച്ചിട്ടുണ്ട്. കേരളത്തിലെ മനോഹരമായതും ആൾത്തിരക്കേറിയതുമായ ബീച്ചുകളിലൊന്നാണ് കോഴിക്കോട് ബീച്ച്. കോവിഡ് വ്യാപനത്തിന്…
View Post

മൂന്നാറിൻ്റെ തലവര മാറ്റാൻ ‘എസ്കേപ്പ് റോഡ്’

എഴുത്ത് – ദയാൽ കരുണാകരൻ. ഇപ്പോൾ കൊടൈക്കനാലും മൂന്നാറും തമ്മിലുള്ള യാത്രാ അകലം വാസ്തവത്തിൽ വെറും 13 കിലോമീറ്ററാണ്. കൊടൈക്കനാലിന്റ്റെ തെക്കുപടിഞ്ഞാറ് ഭാഗത്തുള്ള ടൂറിസ്റ്റ് സ്പോട്ടാണ് ബെരിജം തടാകം. ദിവസവും ഇവിടേക്ക് നിശ്ചിത എണ്ണം സന്ദർശ്ശകരുടെ വാഹനങ്ങൾ കടത്തി വിടുന്നുമുണ്ട്. ഇനി…
View Post

കെഎസ്ആർടിസി മിന്നൽ ബസ്സുകളിൽ കയറുന്നതിനു മുൻപ് അറിഞ്ഞിരിക്കേണ്ട കാര്യങ്ങൾ

കുറച്ചു നാളുകളായി ചില യാത്രക്കാരുടെ പരാതികളാൽ വാർത്തകളിൽ നിറഞ്ഞു നിൽക്കുന്ന ഒരു ബസ് സർവീസാണ് കെഎസ്ആർടിസിയുടെ മിന്നൽ ബസ് സർവ്വീസുകൾ. എന്തുകൊണ്ടാണ് മിന്നൽ സർവ്വീസിലെ ചില യാത്രക്കാർ പരാതികൾ ഉന്നയിക്കുന്നത്? അതിനുള്ള കാര്യം അറിയുന്നതിനു മുൻപായി എന്താണ് മിന്നൽ ബസ് സർവ്വീസുകൾ…
View Post

കേരളത്തിനകത്തെ തമിഴ് പറയുന്ന ഗ്രാമമായ ‘വട്ടവട’യിലേക്ക്

വിവരണം – സന്ധ്യ ജലേഷ്. മലഞ്ചെരുവുകളെ തഴുകി വരുന്ന കാറ്റേറ്റ് സ്‌ട്രോബറിയും, ആപ്പിളും, കാരറ്റും, കാബേജും, ക്വാളിഫ്‌ലവറും, ഉള്ളിയും, ഉരുളക്കിഴങ്ങും, വെളുത്തുള്ളിയും വിളഞ്ഞു നില്‍ക്കുന്ന തോട്ടങ്ങളും, അലഞ്ഞുതിരിഞ്ഞു നടക്കുന്ന കോവര്‍ കഴുതകളും, തീപ്പെട്ടികൂടുപോലെ നിറമുള്ള വീടുകളും, ചെങ്കുത്തായ മലനിരകള്‍ക്കു നടുവില്‍ ജ്യാമിതീയ…
View Post

അച്ഛനോടൊപ്പം ഞാൻ കണ്ട ഊട്ടി; ഇനിയൊരിക്കലും നടക്കാത്ത ആ യാത്ര

വിവരണം – ശുഭ ചെറിയത്ത്. യാത്രയെക്കുറിച്ച് ചിന്തിക്കുമ്പോൾ മനസ്സിൽ ആദ്യം ഓടിയെത്തുക നാം നടത്തിയ ആദ്യ യാത്ര ആയിരിക്കും. ഓർമയിലെ ആദ്യയാത്ര … ചിലർക്കത് കുടുംബത്തോടൊപ്പമാകാം , ചിലർക്ക് സുഹൃത്തുക്കളോടൊപ്പമാകാം അതുമല്ലെങ്കിൽ സ്ക്കൂൾ വിനോദയാത്രയാകാം … ആ യാത്രയുടെ ബഹിർസ്ഫുരണം പിന്നീടുള്ള…
View Post

1987 ലെ ഒരു ‘എസ്കേപ് റോഡ്’ സാഹസിക യാത്ര !!

വിവരണം – കെ.എം. കുര്യാക്കോസ്. 1987 ൽ ഒരു 1977 മോഡൽ അമ്പാസിഡർ കാറുമായി ടോപ് സ്റ്റേഷനിൽ നിന്നും എസ്കേപ് റോഡുവഴി കൊടൈക്കനാലിലേക്കു നടത്തിയ സാഹസിക യാത്ര. ഞങ്ങൾ കോതമംഗലം M.A. കോളജിലെ അഞ്ച് അദ്ധ്യാപകർ, കൊമേഴ്സിലെ ഐസക് കുര്യൻ (ഷാജി),…
View Post

ചുരുങ്ങിയ ചിലവിൽ 14 സ്ഥലങ്ങളിലേക്ക് ഒരു ഫാമിലി ട്രിപ്പ്

വിവരണം – Karrim Choori. 2019 ഓഗസ്റ്റ് 24 നല്ല ഇടിയും മഴയുള്ള രാത്രി ആയിരുന്നു അത്. 9 മണിക്ക് ഞാനും എന്റെ രണ്ട് മക്കളും, പെങ്ങളെ രണ്ടു കുട്ടികളും, ടോട്ടൽ ആറുപേർ Ritz കാറിൽ നാളെ ഉച്ചവരെയുള്ള ഫുഡ് ഒക്കെ…
View Post