ഏഷ്യയിലെ No.1 ബീച്ചായ രാധാനാഗർ ബീച്ചിലേക്ക് ഒരു കടൽയാത്ര…

Total
14
Shares

പോർട്ട്ബ്ലെയറിലെ കറക്കത്തിനു ശേഷം പിറ്റേദിവസം ഞങ്ങൾ പോയത് ഹാവ്ലോക്ക് എന്നു പേരുള്ള ഒരു ദ്വീപിലേക്ക് ആയിരുന്നു. കടലിലൂടെ വേണം ഇവിടേക്ക് എത്തിച്ചേരുവാൻ. അവിടെയാണ് ഏഷ്യയിലെ തന്നെ ഏറ്റവും മികച്ച ബീച്ചുകളിൽ ഒന്നായ രാധാനാഗർ ബീച്ച് സ്ഥിതി ചെയ്യുന്നത്. അതുതന്നെയായിരുന്നു ഞങ്ങളുടെ യാത്രാലക്ഷ്യവും. അങ്ങനെ രാവിലെതന്നെ ഞങ്ങൾ ബോട്ട് പുറപ്പെടുന്നയിടത്ത് എത്തിച്ചേർന്നു. ഗ്രീൻ ഓഷ്യൻ എന്നു പേരുള്ള ഒരു ക്രൂയിസിലായിരുന്നു ഞങ്ങളുടെ യാത്ര. നോക്കെത്താ ദൂരത്തു കിടക്കുന്ന കടലിലൂടെ രണ്ടരമണിക്കൂർ സഞ്ചരിച്ചു വേണം ഹാവ്ലോക്ക് ദ്വീപിൽ എത്തുവാൻ.

ഞങ്ങളെപ്പോലെതന്നെ ധാരാളം സഞ്ചാരികൾ ക്രൂയിസ് യാത്രയ്ക്കായി എത്തിയിരുന്നു. അങ്ങനെ ഞങ്ങൾ ചെക്കിംഗ് ഒക്കെ കഴിഞ്ഞു ക്രൂയിസിന് ഉള്ളിലേക്ക് പ്രവേശിച്ചു. രണ്ടു ഡെക്കുകളായിരുന്നു ക്രൂയിസിൽ ഉണ്ടായിരുന്നത്. ഞങ്ങൾക്ക് താഴത്തെ ഡെക്കിലായിരുന്നു സീറ്റ്. വളരെ വൃത്തിയുള്ളതായിരുന്നു ക്രൂയിസിന്റെ ഉൾവശം മുഴുവൻ. അതിനിടെ ഞാൻ പതിയെ ക്രൂയിസ് മൊത്തത്തിൽ ഒന്ന് കറങ്ങി കാണുവാനായി പോയി. മൊത്തം മൂന്നു കാറ്റഗറി സീറ്റുകളായിരുന്നു ആ ക്രൂയിസിൽ ഉണ്ടായിരുന്നത്. റോയൽ, ലക്ഷ്വറി, ഡീലക്സ് എന്നിങ്ങനെയായിരുന്നു അവ. ഏറ്റവും മുകളിലാണ് റോയൽ കാറ്റഗറി. കടൽക്കാഴ്ചകൾ എല്ലാം നന്നായി അവിടെനിന്നും ആസ്വദിക്കാൻ പറ്റുമായിരുന്നു. പക്ഷെ കടലിന്റെ ഓളവും മറ്റുമൊക്കെ നന്നായി അനുഭവപ്പെടുന്ന ഏറിയ കൂടിയായിരുന്നു അത്. കൂടാതെ സീറ്റുകളും അൽപ്പം പരുക്കനായാണ് എനിക്ക് തോന്നിയത്. പിന്നെയുള്ളത് രണ്ടും താഴെയാണ്.

ലക്ഷ്വറി കാറ്റഗറിയിൽ ട്രെയിനുകളിലെ പോലെ അങ്ങോട്ടും ഇങ്ങോട്ടും നോക്കിയിരിക്കാവുന്ന തരത്തിലായിരുന്നു ഇരിപ്പിടങ്ങൾ. നടുവിലായി ടേബിളും ഉണ്ടായിരുന്നു. പിന്നെയുള്ളതാണ് ഡീലക്സ് കാറ്റഗറി. ചാരിയിരിക്കാവുന്ന ടൈപ്പ് സീറ്റുകളായിരുന്നു ഡീലക്സ് കാറ്റഗറിയിൽ. ഞങ്ങൾ യാത്ര ചെയ്തത് ഡീലക്സ് കാറ്റഗറിയിൽ ആയിരുന്നു. കാറ്റഗറി മാറുന്നതനുസരിച്ച ടിക്കറ്റ് ചാർജ്ജിൽ വ്യത്യാസങ്ങൾ വരും. രണ്ടര മണിക്കൂറോളം നീളുന്ന ഈ യാത്രയിൽ സമയം തള്ളി നീക്കുവാനായി ക്രൂയിസിൽ ടിവിയും മറ്റുമൊക്കെ ഉണ്ടായിരുന്നു. യാത്ര തുടങ്ങുന്നതിനു മുൻപായി വിമാനത്തിലൊക്കെ കാണുന്നതു പോലെ സുരക്ഷാ കാര്യങ്ങളൊക്കെ വ്യക്തമായി പറഞ്ഞു തന്നിരുന്നു. അങ്ങനെ ഞങ്ങൾ കടലിലൂടെ യാത്ര തുടങ്ങി. മഴക്കാർ മൂടിയ അന്തരീക്ഷമായിരുന്നു ആ സമയത്ത്. എങ്കിലും കടൽ പൊതുവെ ശാന്തമായിരുന്നു. സഞ്ചാരികൾ എല്ലാവരുംതന്നെ കാഴ്ചകൾ ആസ്വദിക്കുന്നുണ്ടായിരുന്നു. മിക്കവർക്കും ഇത് ആദ്യത്തെ തവണയാണ് കടൽയാത്രയെന്നു മുഖഭാവത്തിലൂടെ വ്യക്തമാണ്.

അങ്ങനെ രണ്ടരമണിക്കൂർ നേരത്തെ യാത്രയ്ക്ക് ശേഷം ഞങ്ങൾ ഹാവ്ലോക്ക് ദ്വീപിൽ എത്തിച്ചേർന്നു. BSNL, വൊഡാഫോൺ എന്നിവയ്ക്ക് അവിടെ റേഞ്ച് ഉണ്ടായിരുന്നു. രാധാനാഗർ ബീച്ച് ആണ് ഇവിടത്തെ പ്രധാന ആകർഷണം. ക്രൂയിസ് അടുക്കുന്ന പോർട്ടിൽ നിന്നും ഇവിടേക്ക് ബസ് സർവ്വീസുകൾ ലഭ്യമാണ്. അല്ലെങ്കിൽ ഓട്ടോയോ ടാക്സിയോ വിളിക്കേണ്ടി വരും. ഓട്ടോ ചാർജ്ജും ടാക്സി ചാർജ്ജും ഒക്കെ നല്ല കത്തിയായിരിക്കും എന്നുകൂടി ഓർക്കിപ്പിക്കട്ടെ. 18 കിലോമീറ്റർ നീളമുള്ള ഈ ദ്വീപിൽ എല്ലാവിധ സൗകര്യങ്ങളും ഉണ്ട്. സഞ്ചാരികൾക്ക് താമസിക്കുവാനായി ധാരാളം റിസോർട്ടുകളും ഉണ്ട്. പക്ഷേ നല്ല റേറ്റ് ആയിരിക്കും. എന്നിരുന്നാലും ഇവിടെ വന്നു താമസിച്ചാൽ ദ്വീപ് മുഴുവനും കണ്ടാസ്വദിച്ച് തൃപ്തിയായി മടങ്ങാം.

ഞങ്ങൾക്കായുള്ള ടാക്സി പോർട്ടിന്റെ കവാടത്തിൽ കാത്തുകിടക്കുന്നുണ്ടായിരുന്നു. ഞങ്ങൾ ആദ്യമായി പോയത് കാലാപാന്തർ ബീച്ചിലേക്ക് ആയിരുന്നു. പോകുന്ന വഴി ബ്രേക്ക് ഫാസ്റ്റ് കഴിക്കുവാനായി ഞങ്ങൾ ഒരു ഹോട്ടലിൽ കയറി. മസാലദോശയായിരുന്നു ഞങ്ങൾ ഓർഡർ ചെയ്തത്. ഒരു ആവറേജ് രുചി. അല്ലാതെ വലിയ സംഭവമായി ഒന്നും തോന്നിയില്ല. ഭക്ഷണത്തിനു ശേഷം ഞങ്ങൾ വീണ്ടും യാത്ര തുടർന്നു. അങ്ങനെ കാലാപാന്തർ ബീച്ച് എത്തിച്ചേർന്നു. ഹാവ്ലോക്ക് ദ്വീപിലെ നാല് ബീച്ചുകളിൽ ഒന്നാണിത്. നോൺ പ്ലാസ്റ്റിക് സോൺ ആയിരുന്നു ഈ ബീച്ച്. പ്ലാസ്റ്റിക് സാധനങ്ങൾ കയ്യിൽ കൊണ്ടുവരാമെങ്കിലും ഒന്നുംതന്നെ അവിടെ ഉപേക്ഷിച്ചിട്ട് പോരാൻ പാടില്ല. ഞങ്ങൾ പോയത് ഓഫ് സീസൺ സമയമായതിനാൽ അവിടെ തിരക്ക് വളരെ കുറവായിരുന്നു. ഒക്ടോബർ മുതൽ ഏപ്രിൽ വരെയായിരിക്കും ഇവിടത്തെ സീസൺ സമയം.

വളരെ ശാന്തമായിരുന്നു കാലാപാന്തർ ബീച്ച്. നല്ല നീല നിറം…സിനിമാ ഷൂട്ടിംഗിനൊക്കെ പറ്റിയ നല്ലൊരു സ്ഥലം. എന്തായാലും നല്ല കുടുക്കാൻ സ്ഥലം തന്നെയായിരുന്നു. ബീച്ചിൽ ആരുമില്ലാതിരുന്നതിനാൽ കടൽത്തിരയുടെ ശബ്ദം മാത്രമേ അവിടെ കേൾക്കുമായിരുന്നുള്ളൂ. കടൽത്തീരത്ത് ചിപ്പികൾ പോലെയുള്ള വസ്തുക്കൾ അടിഞ്ഞുകൂടിയിട്ടുണ്ടായിരുന്നു. അങ്ങനെ കുറെ സമയം ഞങ്ങൾ അവിടെ ചിലവഴിച്ചശേഷം ഗോവിന്ദ് നഗർ എന്ന മറ്റൊരു ബീച്ചിലേക്ക് യാത്രയായി. ഒരു ലോക്കൽ ബീച്ച് ആയിരുന്നു ഗോവിന്ദ് നഗർ ബീച്ച്. മൽസ്യബന്ധനത്തിനായുള്ള ധാരാളം വള്ളങ്ങളും ബോട്ടുകളും അവിടെയുണ്ടായിരുന്നു. ഇത് അവിടത്തെ ഒരു ഹാർബർ ബീച്ച് ആയിരിക്കണം. നല്ല തെളിഞ്ഞ വെള്ളമായിരുന്നു അവിടെ. തിര ഒട്ടും ഇല്ലാതിരുന്നതിനാൽ ഒരു കടൽ ആണെന്ന് ഇത് തോന്നിക്കുമായിരുന്നില്ല. നല്ല ചൂട് കാലാവസ്ഥയായിരുന്നു ആ സമയത്ത് അവിടെ അനുഭവപ്പെട്ടത്. കുറച്ചു സമയം ഇവിടെ ചിലവഴിച്ച ശേഷം ഞങ്ങൾ ലോകപ്രശസ്തമായ രാധനാഗർ ബീച്ചിലേക്ക് യാത്രയായി.

ബീച്ചിൽ എത്തിയപാടെ ദാഹം തീർക്കുവാനായി ഞങ്ങൾ ഓരോ കരിക്ക് വാങ്ങി കുടിച്ചു. എന്നിട്ട് ബീച്ചിലേക്ക് നടന്നു.മുൻപ് കണ്ട ബീച്ചുകളിൽ നിന്നും വ്യത്യസ്തമായി ആവിടെ കുറച്ചു സഞ്ചാരികൾ ഉണ്ടായിരുന്നു. അതുപോലെതന്നെ നല്ല തിരയും അവിടെ അനുഭവപ്പെട്ടു. നല്ല അടിപൊളി ബീച്ച്… ആളുകൾ ആൺ-പെൺ വ്യത്യാസമില്ലാതെ ബീച്ചിൽ കുളിക്കുന്നുണ്ടായിരുന്നു. എല്ലാവരും ഇന്ത്യക്കാരായ സഞ്ചാരികളാണ്. ഞങ്ങളും ബീച്ചിലിറങ്ങി കുളിച്ചു. ഇവിടത്തെ ഗോൾഡൻ നിറത്തിലുള്ള മണലും നീല കളർ ഉള്ള കടലും ഏതൊരു സഞ്ചാരിയെയും മോഹിപ്പിക്കും. നല്ല ഒന്നാന്തരം കാറ്റും അവിടെ അനുഭവപ്പെടുന്നുണ്ടായിരുന്നു. കടലിലെ കുളി കഴിഞ്ഞു കാറ്റത്തു കുറച്ചു സമയം നിന്നപ്പോൾ ഞങ്ങളുടെ ദേഹവും വസ്ത്രങ്ങളും എല്ലാം ഉണങ്ങി പഴയതു പോലെയായി മാറി. അങ്ങനെ കുറെ സമയം ഞങ്ങൾ രാധാനാഗർ ബീച്ചിൽ ചിലവഴിക്കുകയുണ്ടായി.

ആൻഡമാനിൽ വരുന്ന ഏതൊരാളും തീർച്ചയായും വന്നിരിക്കേണ്ട ഒരു സ്ഥലമാണ് ഹാവ്ലോക്ക് ദ്വീപ്. പറ്റുമെങ്കിൽ ഇവിടെ ഒരു ദിവസമെങ്കിലും താമസിക്കുവാനും ശ്രമിക്കുക. അടിപൊളി സ്ഥലമാണ്. അങ്ങനെ ഞങ്ങളുടെ ഹാവ്ലോക്ക് ദ്വീപ് പര്യടനമെല്ലാം അവസാനിച്ചിരിക്കുകയാണ്. ഇനി തിരികെ പോർട്ട് ബ്ലെയറിലേക്ക് മടങ്ങണം. തിരികെ പോകുവാനായി രാവിലെ വന്നിറങ്ങിയ പോർട്ടിൽ എത്തി. ഇനി അവിടുന്ന് ക്രൂയിസിൽ കയറി വന്നതുപോലെ മടക്കം. ഇനിയുള്ള രണ്ടരമണിക്കൂർ ഒരൽപം വിശ്രമത്തിനായി മാറ്റിവെക്കാം. ആൻഡമാൻ ട്രാവൽ പാക്കേജുകൾക്ക് ഈസി ട്രാവൽസിനെ വിളിക്കാം: 9387686600.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

You May Also Like

തണുപ്പ് ആസ്വദിക്കാൻ ഒരു യാത്ര പോകാം… ഇതാ ടോപ് 10 സ്ഥലങ്ങൾ

അൽപ്പം തണുപ്പ് ആസ്വദിക്കുവാനായി ഒരു ട്രിപ്പ് പോകുന്നവർ ധാരാളമാണ്. ഇത്തരത്തിൽ തണുപ്പ് ആസ്വദിക്കുവാനായി തിരഞ്ഞെടുക്കാവുന്ന മികച്ച പത്ത് സ്ഥലങ്ങളാണ് ചുവടെ കൊടുത്തിരിക്കുന്നത്. 1. മൂന്നാർ – കേരളത്തിൽ തണുപ്പ് ആസ്വദിക്കുവാൻ ഏറ്റവും അനുയോജ്യമായ സ്ഥലം മൂന്നാർ തന്നെയാണെന്നതിൽ ആർക്കും സംശയമൊന്നും ഉണ്ടാകില്ല.…
View Post

1000 രൂപയ്ക്ക് താമസമടക്കം ‘മൂന്നാർ’ ടൂർ പാക്കേജുമായി കെഎസ്ആർടിസി

കേരളത്തിൽ ഏറ്റവും കൂടുതൽ വിനോദസഞ്ചാരികൾ വരുന്ന സ്ഥലങ്ങളിലൊന്നാണ് ഇടുക്കി ജില്ലയിലെ മൂന്നാർ. വിശാലമായ തേയിലത്തോട്ടങ്ങള്‍, മനോഹരമായ ചെറു പട്ടണങ്ങള്‍, വളഞ്ഞുയര്‍ന്നും താഴ്ന്നും പോവുന്ന പാതകള്‍, അവധി ആഘോഷത്തിന് യോജിച്ച സൗകര്യങ്ങള്‍, തണുത്ത കാലാവസ്ഥ, പുൽമേടുകൾ, ഷോലക്കാടുകൾ തുടങ്ങിയ ഘടകങ്ങളാണ് മൂന്നാറിന്റെ പ്രകൃതഭംഗിയ്ക്ക്…
View Post

കേരളത്തിൽ റോഡ് ട്രിപ്പിനു പറ്റിയ അഞ്ച് മനോഹര റൂട്ടുകൾ…

യാത്രകൾ പല തരത്തിൽ ആസ്വദിക്കുന്നവരുണ്ട്. ചിലർ സ്ഥലങ്ങലും കാഴ്ചകളും ഒക്കെ കണ്ട് ആസ്വദിക്കും, ചിലർ ഓരോ സ്ഥലത്തെയും ഭക്ഷണങ്ങൾ രുചിച്ച് ആസ്വദിക്കും, ചിലർ കൂട്ടുകാരും കുടുംബവുമൊക്കെയായിട്ട് ഒരു അടിച്ചുപൊളി മൂഡിലായിരിക്കും യാത്ര പോകുന്നത്. മറ്റു ചിലരാകട്ടെ ഡ്രൈവിംഗ് ആയിരിക്കും ഇഷ്ടപ്പെടുക. ഇത്തരത്തിൽ…
View Post

ബെംഗളൂരു നഗരത്തിനുള്ളിൽ നിങ്ങൾ കണ്ടിരിക്കേണ്ട 15 സ്ഥലങ്ങൾ..

ബെംഗളൂരു ഇന്ത്യയിലെ വലിയ മെട്രോ നഗരങ്ങളിൽ ഒന്നാണ്. അതുകൊണ്ടു തന്നെ ഇവിടെ കാഴ്ചകളും ധാരാളമുണ്ട്. ബെംഗളുരുവിലേക്ക് വരുന്നവർക്ക് സന്ദർശിക്കാവുന്ന 15 സ്ഥലങ്ങളെയാണ് ഈ ലേഖനത്തിലൂടെ പരിചയപ്പെടുത്തുവാൻ പോകുന്നത്. 1 ടിപ്പു സുൽത്താൻ സമ്മർ പാലസ് : ബെംഗളൂരുവിലെ കെആർ മാർക്കറ്റിനു സമീപമാണ്…
View Post

കെഎസ്ആർടിസിയുടെ മലക്കപ്പാറ ടൂർ പാക്കേജ് വമ്പൻ ഹിറ്റ് !!

കെ എസ് ആർ ടി സിയുടെ മലക്കപ്പാറ പാക്കേജ് സർവീസ് ഇന്ന് കേരളമാകെ ഹിറ്റ്! അവധി ദിനങ്ങളിൽ സഞ്ചാരികൾക്കായി ചാലക്കുടിയിൽ നിന്നും ഏർപ്പെടുത്തിയ പ്രത്യേക സർവ്വീസുകൾ സൂപ്പർ ഹിറ്റായതിനെ തുടർന്ന് യാത്രക്കാരുടെ ആവശ്യം പരിഗണിച്ച് മറ്റു ഡിപ്പോകളിലേയ്ക്കും വ്യാപിപ്പിക്കുകയായിരുന്നു. ആദ്യഘട്ടം എന്ന…
View Post

ഒരു കെഎസ്ആർടിസി ബസ് മുഴുവനും ബുക്ക് ചെയ്ത് ഞങ്ങളുടെ കോളേജ് ടൂർ…

നിങ്ങളുടെ ജീവിതത്തിൽ ഏറ്റവും കൂടുതൽ സന്തോഷിച്ചിട്ടുള്ള, മറക്കാനാവാത്ത നിമിഷങ്ങൾ എപ്പോഴായിരിക്കും? കോളേജ് ദിനങ്ങൾ എന്നായിരിക്കും ഭൂരിഭാഗം ആളുകളുടെയും ഉത്തരം. അതെ എൻ്റെ ജീവിതത്തിലെയും മറക്കാനാവാത്ത നിമിഷങ്ങൾ സമ്മാനിച്ചത് എൻ്റെ കലാലയ ജീവിതമായിരുന്നു. ബെംഗളൂരുവിലെ ന്യൂ ഹൊറൈസൺ കോളേജിൽ ആയിരുന്നു എൻ്റെ ബി.ടെക്.…
View Post

കോഴിക്കോട് നിന്നും വൺ ഡേ ട്രിപ്പ് പോകാൻ പറ്റിയ അഞ്ച് സ്ഥലങ്ങൾ…

കേരളത്തിൽ ഏറ്റവും കൂടുതൽ സഞ്ചാരികൾ വസിക്കുന്നത് മലബാർ മേഖലകളിലാണ്. സോഷ്യൽ മീഡിയയിലെ ട്രാവൽ ഗ്രൂപ്പുകളിൽ നിറഞ്ഞ സാന്നിധ്യത്തോടെയാണ് ഇവരുടെ മുന്നേറ്റം. ഇവരിൽ കൂടുതൽപേരും മലപ്പുറം, കോഴിക്കോട് ജില്ലകളിൽ നിന്നുള്ളവരാണ്. അതുകൊണ്ട് ഇത്തവണ സ്വൽപ്പം വടക്കൻ വിശേഷങ്ങളാണ് നിങ്ങള്ക്ക് മുന്നിൽ പങ്കുവെയ്ക്കാൻ പോകുന്നത്.…
View Post

ഊട്ടിയിൽ പോകുന്നവർ കണ്ടിരിക്കേണ്ട ചില സ്ഥലങ്ങളെ പരിചയപ്പെടാം..

മലയാളികൾക്ക് പണ്ടുമുതലേ ടൂർ എന്നു വെച്ചാൽ ഊട്ടിയോ കൊടൈക്കനാലോ ഒക്കെയാണ്. എങ്കിലും കൊടൈക്കനാലിനെക്കാളും ഒരുപടി മുന്നിലാണ് ഊട്ടിയെ നമ്മൾ പ്രതിഷ്ഠിച്ചിരിക്കുന്നത്. കോളേജ് ടൂർ, ഫാമിലി ടൂർ, ഹണിമൂൺ എന്നുവേണ്ട മിക്കവരുടെയും ടൂർ ലൊക്കേഷൻ ഊട്ടിയായിരിക്കും. ഊട്ടിയിൽ ചിത്രീകരിച്ച മലയാള സിനിമകൾ ഒരു…
View Post