ഇന്ത്യയിലെയെന്നല്ല, സൗത്ത് ഏഷ്യയിലെത്തന്നെ ഏറ്റവും വലിയ സിനിമാ സ്ക്രീന്, ലോകത്തിലെ മൂന്നാമത്തെ വലിയ സിനിമാ സ്ക്രീന്… ഇങ്ങനെയൊരു തിയേറ്ററില് സിനിമ കാണണമെന്നുണ്ടോ? എങ്കില് നേരെ ആന്ധ്രാപ്രദേശിലേക്കു പോകേണ്ടി വരും. ആന്ധ്രയിലെ നെല്ലൂര് ജില്ലയിലെ സുള്ളൂര്പേട്ടയിലുള്ള V Epiq എന്ന തിയേറ്ററിനാണ് മേല്പ്പറഞ്ഞ സവിശേഷതകളുള്ളത്.
ആന്ധ്ര പ്രദേശിലും തെലങ്കാനയിലും 50 ഓളം സ്ക്രീനുകളുള്ള V Celluloid എന്ന സിനിമാ തിയറ്റര് ശൃംഖലയുടെ ഉടമ കൂടിയായ പ്രശസ്ത നിർമ്മാതാവ് വംശി കൃഷ്ണയുടെ ഉടമസ്ഥതയിലുള്ളതാണ് ഈ മൂന്ന് സ്ക്രീൻ തിയേറ്റർ.
V Epiq ലെ ബിഗ്സ്ക്രീനിന് 100 അടി വീതിയും 54 അടി ഉയരവുമുണ്ട്. കൂടാതെ 656 സീറ്റിംഗ് കപ്പാസിറ്റിയുമുണ്ട്. സ്റ്റേഡിയം ടൈപ്പ് സീറ്റിംഗ് ആണ് ഈ തിയേറ്ററിൽ സജ്ജീകരിച്ചിരിക്കുന്നത്.
ഇത് കൂടാതെ ഈ തിയേറ്റര് സമുച്ചയത്തിൽ 170 സീറ്റുകൾ വീതമുള്ള രണ്ട് സ്ക്രീനുകൾ കൂടിയുണ്ട്.
4k Barco Flagship Lazer projector, Dolby Atmos sound – 360-degree immersive audio system തുടങ്ങിയവയും Vepiq ൻ്റെ സവിശേഷതകളാണ്. മൂന്നേക്കർ സ്ഥലത്ത് ഏകദേശം 10 കോടി രൂപ മുടക്കിയാണ് V Epiq Cinema പൂര്ത്തീകരിച്ചിരിക്കുന്നത്.
2019 ല് പ്രശസ്ത തെന്നിന്ത്യന് താരം രാംചരണായിരുന്നു ഈ തിയേറ്റര് ഉദ്ഘാടനം ചെയ്തത്. ഇവിടത്തെ ബിഗ്സ്ക്രീനില് ആദ്യം പ്രദര്ശിപ്പിച്ച സിനിമ പ്രഭാസ് നായകനായ ‘സാഹോ’ആണ്. ഈ തിയേറ്ററിലെ ആദ്യ ദിവസത്തെ ഗ്രോസ് കളക്ഷൻ 19.5 ലക്ഷം രൂപയായിരുന്നു.
നിലവിൽ ആന്ധ്രാപ്രദേശിൽ തിയേറ്ററുകളിൽ നിരക്കുകൾ ക്ളാസ്സുകൾ തിരിച്ച് ഏകീകരിക്കുക എന്ന ഉദ്ദേശ്യത്തോടെ നടപ്പിലാക്കിയ Go-35 എന്ന നിയമം വന്നതോടെ ഇന്ത്യയിലെ ഈ വലിയ സ്ക്രീൻ പ്രദർശനം നിർത്തി വെച്ചിരിക്കുകയാണ്. 100 Rs, 200 Rs എന്നിങ്ങനെ ടിക്കറ്റ് നിരക്കുകളുണ്ടായിരുന്ന VEpiq ൽ പുതിയ നിയമം വന്നതോടെ ചാർജ്ജ് 30 രൂപ എന്ന രീതിയിൽ ആക്കേണ്ടി വരുമെന്നതിനാലാണ് ഇത്. ഇത്രയും സൗകര്യങ്ങളും സവിശേഷതകളും നൽകുന്ന ഈ തിയേറ്ററിൽ 30 രൂപ ചാർജ്ജ് എന്നത് വലിയ നഷ്ടം തന്നെയാണെന്നതിൽ യാതൊരു സംശയവുമില്ല. എന്തായാലും ഇതിനെല്ലാം ഒരു പരിഹാരം കണ്ട് ഇന്ത്യയിലെ ഏറ്റവും വലിയ ഈ ബിഗ്സ്ക്രീൻ തിയേറ്റർ വീണ്ടും പ്രദർശനമാരംഭിക്കും എന്ന് പ്രതീക്ഷിക്കാം.