അമ്മച്ചി കൊട്ടാരം വഴി തേക്കടിയിലേക്ക് ഒരു ബാച്ചിലർ ട്രിപ്പ്..

Total
7
Shares

വിവാഹത്തിനു ശേഷവും വേണമെങ്കിൽ നമുക്ക് കൂട്ടുകാരുമൊത്ത് ബാച്ചിലർ ട്രിപ്പുകൾക്ക് പോകാവുന്നതാണ്. പക്ഷേ അതിനു ഭാര്യയുടെ സമ്മതം വേണമെന്നു മാത്രം.. അങ്ങനെ കുറേക്കാലത്തിനു ശേഷം ഞാൻ സുഹൃത്തുക്കളുമായി ഒരു ട്രിപ്പ് പോകുവാൻ പ്ലാൻ ചെയ്തു. എറണാകുളത്തുള്ള എൻ്റെ സുഹൃത്തായ എമിലും അവൻ്റെ കസിൻ ബ്രദറും ആയിരുന്നു എന്നോടൊപ്പം ട്രിപ്പിൽ പങ്കുചേർന്നത്.

എൻ്റെ വീട്ടിൽ നിന്നും മുണ്ടക്കയം, കുട്ടിക്കാനം വഴി തേക്കടിയിലേക്ക് പോകുവാൻ ആയിരുന്നു ഞങ്ങളുടെ പ്ലാൻ. ഒപ്പംതന്നെ കുട്ടിക്കാനത്തുള്ള പ്രസിദ്ധമായ അമ്മച്ചിക്കൊട്ടാരത്തിൽ ഒരു സന്ദർശനം നടത്തുകയും ചെയ്യാം.

അങ്ങനെ രാവിലെ തന്നെ ഞങ്ങൾ മൂന്നുപേരും കോഴഞ്ചേരിയിൽ നിന്നും യാത്രയാരംഭിച്ചു. പോകുന്ന വഴി റാന്നി ടൗണിൽ കുറച്ചു സമയം ട്രാഫിക് ബ്ലോക്കിൽ കിടക്കേണ്ടി വന്നു. എമിൽ ആയിരുന്നു വണ്ടി ഓടിച്ചിരുന്നത്. ആള് ഡ്രൈവിംഗിൽ പുലിയാണ്. റാന്നിയും പിന്നിട്ട് ഞങ്ങൾ എരുമേലിയിൽ എത്തിച്ചേർന്നു. ശബരിമല സീസൺ ആയതിനാൽ എരുമേലിയിൽ ധാരാളം അയ്യപ്പഭക്തരെ കാണാമായിരുന്നു.

എരുമേലിയിൽ നിന്നും ഞാൻ വണ്ടിയുടെ നിയന്ത്രണം ഏറ്റെടുത്തു. അങ്ങനെ ഞങ്ങൾ മുണ്ടക്കയം പിന്നിട്ട് ഹൈറേഞ്ച് ഏരിയയിലേക്ക് കയറി. പിന്നിട്ട് അങ്ങോട്ട് ഒരു വശത്തു കാഴ്ചകളുടെ കലവറ തന്നെയായിരുന്നു. കുട്ടിക്കാനം എത്തുന്നതിനു മുൻപായി മിസ്റ്റി മൗണ്ടൻ എന്നൊരു റിസോർട്ട് കാണാം. അതിനു തൊട്ടു മുൻപുള്ള വഴിയിലൂടെ ഉള്ളിലേക്ക് കയറി വേണം അമ്മച്ചികൊട്ടാരത്തിലേക്ക് പോകുവാൻ.

കാടുകൾക്ക് ഇടയിലൂടെ അവിടേക്കുള്ള വഴി അൽപ്പം ഹൊറർ മൂഡ് നൽകുന്നതാണ്. ഒറ്റയ്ക്ക് ഇവിടേക്ക് വരുന്നവർ പകൽ ആണെങ്കിലും ചിലപ്പോൾ ഒന്നു പേടിക്കും. കുറച്ചു ദൂരം സഞ്ചരിച്ചു കഴിയുമ്പോൾ കൊട്ടാരത്തിലേക്കുള്ള കവാടം കാണാം.

അമ്മച്ചിക്കൊട്ടാരം എന്ന പേര് മിക്കയാളുകളും സോഷ്യൽ മീഡിയയിലെ വിവിധ യാത്രാ ഗ്രൂപ്പുകളിൽ നിന്നും കേട്ടിട്ടുണ്ടാകും. എന്നാൽ പലരും ഇത് നേരിൽ കണ്ടുകാണില്ല. പക്ഷേ ചില സിനിമകളിൽക്കൂടി നമ്മൾ ഈ കൊട്ടാരം കണ്ടിട്ടുണ്ട്. അതിൽ പ്രധാനമായും എടുത്തു പറയേണ്ടത് ഫഹദ് ഫാസിൽ അഭിനയിച്ച ‘കാർബൺ’ സിനിമയാണ്. അതിൽ കാണിച്ചിരിക്കുന്ന ഹൊറർ ബംഗ്ളാവ് ഈ അമ്മച്ചിക്കൊട്ടാരമാണ്.

തിരുവിതാംകൂർ മഹാറാണിയുടെ വേനൽക്കാല വസതിയായിരുന്നു ഈ കൊട്ടാരം. അതുകൊണ്ടാണ് ഇതിനു അമ്മച്ചിക്കൊട്ടാരം എന്ന പേര് വന്നത്. ഏകദേശം 220 ഓളം വർഷങ്ങൾ പഴക്കമുണ്ട് ഈ കൊട്ടാരത്തിന്. പിന്നീട് കാലങ്ങൾ പിന്നിട്ടപ്പോൾ ഈ കൊട്ടാരം ബെംഗളൂരു ആസ്ഥാനമായുള്ള ഏതോ ഒരു ഐടി കമ്പനിയുടെ ഉടമസ്ഥതയിലായി. തിരുവിതാംകൂർ രാജവംശത്തിന്റെ ഉടമസ്ഥതയിലുണ്ടായിരുന്നതും സ്വാതന്ത്ര്യത്തിനു ശേഷം കേരള സർക്കാരിനു കീഴിൽ വരേണ്ടിയിരുന്നതുമായ ഈ കൊട്ടാരം എങ്ങനെ സ്വകാര്യ വ്യക്തികളുടെ ഉടമസ്ഥതയിൽ വന്നു എന്നത് ഇന്നും ഉത്തരം കിട്ടാത്ത ഒരു ചോദ്യമാണ്.

ഇന്ന് കൊട്ടാരത്തിൽ തമിഴ്‌നാട് സ്വദേശിയായ ഒരു കാര്യസ്ഥനും കുടുംബവുമാണ് താമസിക്കുന്നത്. അദ്ദേഹത്തിൻ്റെ പേര് ധർമ്മലിംഗം എന്നാണ്. 53 ഓളം വർഷങ്ങളായി ധർമ്മലിംഗം ചേട്ടൻ ഇവിടെ താമസമാക്കിയിട്ട്. കൊട്ടാരം ഐടി കമ്പനിയുടെ ഉടമസ്ഥതയിൽ ആയെങ്കിലും ചേട്ടനും കുടുംബവും ഇന്നും ഇവിടെ താമസിക്കുന്നു. മേൽനോട്ടം നടത്തുന്നതിന് ചേട്ടന് ശമ്പളം ഒന്നും ഇല്ലെങ്കിലും ഇവിടെ എത്തുന്ന സഞ്ചാരികൾ നൽകുന്ന തുകയാണ് ഒരാശ്വാസം. കൂടാതെ ചേട്ടന്റെ ഭാര്യ ഇവിടെ അടുത്തെവിടെയോ ജോലിയ്ക്ക് പോകുന്നുമുണ്ട്.

ഞാൻ ഇതിനു മുൻപ് കൊട്ടാരത്തിൽ വന്നു വീഡിയോ ഒക്കെ എടുത്തിട്ടുണ്ടായിരുന്നു. ആ പരിചയം ചേട്ടനുമായി ഒന്നു പുതുക്കാൻ ഞാൻ ശ്രമിച്ചു. പക്ഷേ ചേട്ടന് അത്രയ്ക്ക് ഓർമ്മ പോരാ. അകത്തു കയറുന്നതിനായി ചേട്ടന് ഞങ്ങൾ 100 രൂപ നൽകി. അനുഭവ സമ്പത്തുള്ള ഒരു ഗൈഡിനെപ്പോലെ ചേട്ടൻ കൊട്ടാരത്തിന്റെ മുക്കും മൂലയും എല്ലാം ഞങ്ങൾക്ക് കാണിച്ചു തരികയും വിശദമായി അതിനെക്കുറിച്ചു പറഞ്ഞു തരികയും ചെയ്തു.

കൊട്ടാരത്തിൽ നിന്നും വിവിധ ഭാഗങ്ങളിലേക്ക് എത്തിച്ചേരുവാൻ സാധിക്കുന്ന രഹസ്യ തുരങ്കങ്ങളും ഞങ്ങൾക്ക് കാണുവാൻ സാധിച്ചു. എന്നാൽ ഇപ്പോൾ അതിലൂടെ ആരെയും പ്രവേശിപ്പിക്കുന്നില്ല. കുട്ടിക്കാനം വഴി പോകുന്നവർക്ക് കയറിക്കാണുവാൻ സാധിക്കുന്ന ഒരു സ്ഥലം തന്നെയാണ് അമ്മച്ചിക്കൊട്ടാരം.

കൊട്ടാരത്തിലെ കാഴ്ചകൾ കണ്ടതിനു ശേഷം ഞങ്ങൾ വീണ്ടും യാത്ര തുടർന്നു. തേക്കടിയാണ് ഇനി ഞങ്ങളുടെ ലക്‌ഷ്യം. കുമളി ടൗണും പിന്നിട്ട് ഞങ്ങൾ തേക്കടിയിലേക്ക് തിരിയുന്ന സ്ഥലത്ത് എത്തിച്ചേർന്നു. തേക്കടിയിൽ ഞങ്ങളുടെ താമസം തയ്യാറാക്കിയിരുന്നത് 50 ഏക്കറോളം വരുന്ന ഏലക്കാടിന് നടുവിലുള്ള ഒരു പ്ലാന്റേഷൻ വില്ലയിലായിരുന്നു.
‘ഏയ്ഞ്ചൽസ് ട്രംപറ്റ്’ എന്നായിരുന്നു ആ പ്ലാന്റെഷൻ വില്ലയുടെ പേര്.

അവിടേക്കുള്ള വഴി ഇടുങ്ങിയതും അൽപ്പം ഓഫ്റോഡും ആയിരുന്നു. കുറച്ചു സമയത്തെ കിടിലൻ യാത്രയ്ക്കു ശേഷം ഞങ്ങൾ സ്ഥലത്ത് എത്തിച്ചേർന്നു. ഒരു മനോഹരമായ വലിയ കുളവും അതിനടുത്തായി എല്ലാവിധ സൗകര്യങ്ങളോടു കൂടിയതുമായ വില്ലയും. കാടിനു നടുവിൽ ഇതുപോലൊരു അടിപൊളി സെറ്റപ്പ് ഉണ്ടെന്നു ഞാൻ വിചാരിച്ചിരുന്നില്ല.

ഞങ്ങൾ അവിടെ ചെന്നപ്പോൾ വില്ലയുടെ ഉടമസ്ഥനായ സ്റ്റാനി ചേട്ടൻ വന്നു ഞങ്ങളെ സ്വീകരിക്കുകയുണ്ടായി. ഒത്തിരി വ്യത്യസ്തമായ കാര്യങ്ങൾ അവിടെയുണ്ടെന്ന് സ്റ്റാനി ചേട്ടൻറെ വിവരണത്തിൽ നിന്നും മനസ്സിലായി. എന്തായാലും ഞങ്ങളുടെ ഇത്തവണത്തെ ബാച്ചിലർ ട്രിപ്പ് പൊളിക്കും എന്നുറപ്പായി.
ഏയ്ഞ്ചൽസ് ട്രംപറ്റ് വില്ലയിലെ വിശേഷങ്ങൾ അടുത്ത എപ്പിസോഡിൽ പറഞ്ഞു തരാം.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

You May Also Like

തണുപ്പ് ആസ്വദിക്കാൻ ഒരു യാത്ര പോകാം… ഇതാ ടോപ് 10 സ്ഥലങ്ങൾ

അൽപ്പം തണുപ്പ് ആസ്വദിക്കുവാനായി ഒരു ട്രിപ്പ് പോകുന്നവർ ധാരാളമാണ്. ഇത്തരത്തിൽ തണുപ്പ് ആസ്വദിക്കുവാനായി തിരഞ്ഞെടുക്കാവുന്ന മികച്ച പത്ത് സ്ഥലങ്ങളാണ് ചുവടെ കൊടുത്തിരിക്കുന്നത്. 1. മൂന്നാർ – കേരളത്തിൽ തണുപ്പ് ആസ്വദിക്കുവാൻ ഏറ്റവും അനുയോജ്യമായ സ്ഥലം മൂന്നാർ തന്നെയാണെന്നതിൽ ആർക്കും സംശയമൊന്നും ഉണ്ടാകില്ല.…
View Post

1000 രൂപയ്ക്ക് താമസമടക്കം ‘മൂന്നാർ’ ടൂർ പാക്കേജുമായി കെഎസ്ആർടിസി

കേരളത്തിൽ ഏറ്റവും കൂടുതൽ വിനോദസഞ്ചാരികൾ വരുന്ന സ്ഥലങ്ങളിലൊന്നാണ് ഇടുക്കി ജില്ലയിലെ മൂന്നാർ. വിശാലമായ തേയിലത്തോട്ടങ്ങള്‍, മനോഹരമായ ചെറു പട്ടണങ്ങള്‍, വളഞ്ഞുയര്‍ന്നും താഴ്ന്നും പോവുന്ന പാതകള്‍, അവധി ആഘോഷത്തിന് യോജിച്ച സൗകര്യങ്ങള്‍, തണുത്ത കാലാവസ്ഥ, പുൽമേടുകൾ, ഷോലക്കാടുകൾ തുടങ്ങിയ ഘടകങ്ങളാണ് മൂന്നാറിന്റെ പ്രകൃതഭംഗിയ്ക്ക്…
View Post

കേരളത്തിൽ റോഡ് ട്രിപ്പിനു പറ്റിയ അഞ്ച് മനോഹര റൂട്ടുകൾ…

യാത്രകൾ പല തരത്തിൽ ആസ്വദിക്കുന്നവരുണ്ട്. ചിലർ സ്ഥലങ്ങലും കാഴ്ചകളും ഒക്കെ കണ്ട് ആസ്വദിക്കും, ചിലർ ഓരോ സ്ഥലത്തെയും ഭക്ഷണങ്ങൾ രുചിച്ച് ആസ്വദിക്കും, ചിലർ കൂട്ടുകാരും കുടുംബവുമൊക്കെയായിട്ട് ഒരു അടിച്ചുപൊളി മൂഡിലായിരിക്കും യാത്ര പോകുന്നത്. മറ്റു ചിലരാകട്ടെ ഡ്രൈവിംഗ് ആയിരിക്കും ഇഷ്ടപ്പെടുക. ഇത്തരത്തിൽ…
View Post

കണ്ണൂർ ജില്ലയിൽ ഫാമിലി ട്രിപ്പ് പോകുവാൻ പറ്റിയ അഞ്ച് സ്ഥലങ്ങൾ

കേരളത്തിലെ വടക്കേയറ്റത്ത് സ്ഥിതി ചെയ്യുന്ന ഒരു ജില്ലയാണ് കണ്ണൂർ. കണ്ണൂർ പട്ടണത്തിന്റെ ആധുനിക ചരിത്രം തുടങ്ങുന്നത് പോർച്ചുഗീസുകാർ മലബാറിൽ പ്രവേശിച്ചതോടുകൂടിയാണ്. പ്രശസ്ത നാടൻ കലാരൂപമായ തെയ്യം കളിയാടുന്നത് കണ്ണൂർ ജില്ലയിലാണ്. തെയ്യം കാണണമെങ്കിൽ ഇവിടേക്ക് തന്നെ വരണം. തെയ്യവും സര്‍ക്കസും ക്രിക്കറ്റും…
View Post

മൂന്നാറിൽ ഫാമിലിയായിട്ട് തങ്ങുവാൻ പറ്റിയ കിടിലൻ സ്ഥലങ്ങൾ

മലയാളികൾ ടൂർ പോകുവാൻ പ്ലാൻ ചെയ്യുമ്പോൾ ആദ്യത്തെ ലിസ്റ്റിൽ വരുന്ന ഒരു സ്ഥലമാണ് മൂന്നാർ. എന്തുകൊണ്ടാണ് മൂന്നാർ എല്ലാവർക്കും ഇത്ര പ്രിയങ്കരമായത് എന്ന ചോദ്യത്തിന് ഇന്ന് വലിയ പ്രസക്തി ഉണ്ടെന്നു തോന്നുന്നില്ല. ഒറ്റവാക്കിൽ പറഞ്ഞാൽ മൂന്നാർ പച്ചപട്ടുടുത്ത ഒരു തണുത്ത സുന്ദരിയാണ്.…
View Post

തൃശ്ശൂരിൽ നിന്നും ഒരു ദിവസം കൊണ്ട് പോയി വരാവുന്ന ടൂറിസ്റ്റു കേന്ദ്രങ്ങൾ

കേരളത്തിന്റെ സാംസ്കാരിക തലസ്ഥാനമായ, പൂരങ്ങളുടെ നാടായ തൃശ്ശൂരിലും പരിസരപ്രദേശങ്ങളിലുമായി ഒത്തിരി വിനോദസഞ്ചാരന്ദ്രങ്ങളുണ്ട്. തൃശ്ശൂരിൽ നിന്നും ഒരു ദിവസംകൊണ്ട് പോയി വരാവുന്ന വിനോദസഞ്ചാര കേന്ദ്രങ്ങൾ ഏതൊക്കെയെന്നു നിങ്ങൾക്കറിയാമോ? കൺഫ്യൂഷൻ ഉണ്ടെങ്കിൽ ചിലത് ഞങ്ങൾ പറഞു തരാം. 1. നെല്ലിയാമ്പതി – തൃശ്ശൂരിന്റെ അയൽജില്ലയായ…
View Post

കോഴിക്കോട് നിന്നും വൺ ഡേ ട്രിപ്പ് പോകാൻ പറ്റിയ അഞ്ച് സ്ഥലങ്ങൾ…

കേരളത്തിൽ ഏറ്റവും കൂടുതൽ സഞ്ചാരികൾ വസിക്കുന്നത് മലബാർ മേഖലകളിലാണ്. സോഷ്യൽ മീഡിയയിലെ ട്രാവൽ ഗ്രൂപ്പുകളിൽ നിറഞ്ഞ സാന്നിധ്യത്തോടെയാണ് ഇവരുടെ മുന്നേറ്റം. ഇവരിൽ കൂടുതൽപേരും മലപ്പുറം, കോഴിക്കോട് ജില്ലകളിൽ നിന്നുള്ളവരാണ്. അതുകൊണ്ട് ഇത്തവണ സ്വൽപ്പം വടക്കൻ വിശേഷങ്ങളാണ് നിങ്ങള്ക്ക് മുന്നിൽ പങ്കുവെയ്ക്കാൻ പോകുന്നത്.…
View Post

എന്താണ് ദുബായ് എക്സ്പോ? അവിടെ എന്തൊക്കെ കാണാം? ആകർഷണങ്ങൾ…

ഇപ്പോൾ മാധ്യമങ്ങളിലും സോഷ്യൽ മീഡിയകളിലും, പിന്നെ പ്രവാസി സുഹൃത്തുക്കൾക്കിടയിലും സംസാരവിഷയമായിരിക്കുന്ന ഒന്നാണ് ദുബായ് എക്സ്പോ. എന്താണ് ഈ ദുബായ് എക്സ്പോ എന്ന് ശരിക്കും അറിയാത്ത ചിലരെങ്കിലും നമുക്കിടയിലുണ്ടാകും. അവർക്കായി ദുബായ് എക്സ്പോയുടെ വിശേഷങ്ങൾ പങ്കുവെയ്ക്കാം. ബ്യൂറോ ഒഫ് ഇന്റർനാഷണൽ എക്സ്പോസിഷൻസിന്റെ മേൽനോട്ടത്തിൽ…
View Post

മുഖം മിനുക്കി കളർഫുള്ളായി നമ്മുടെ സ്വന്തം കോഴിക്കോട് ബീച്ച്

കോഴിക്കോടിനെ കുറിച്ച് ചിന്തിക്കുമ്പോൾ നമ്മുടെ മനസ്സിലേക്ക് ഓടിയെത്തുന്ന ചിത്രങ്ങളാണ് കോഴിക്കോട് ബീച്ചും മിഠായിതെരുവും മാനാഞ്ചിറയും കുറ്റിച്ചിറയും തളിയുമെല്ലാം. ഒരു സഞ്ചാരി എന്ന നിലയിൽ ഇവയുടെയൊക്കെ മനോഹാരിത എന്നും ഒരുപാട് സന്തോഷിപ്പിച്ചിട്ടുണ്ട്. കേരളത്തിലെ മനോഹരമായതും ആൾത്തിരക്കേറിയതുമായ ബീച്ചുകളിലൊന്നാണ് കോഴിക്കോട് ബീച്ച്. കോവിഡ് വ്യാപനത്തിന്…
View Post