ദിൽസേ സിനിമയിലെ “ഛയ്യ ഛയ്യാ..” എന്ന പാട്ടു കണ്ടതു മുതൽ എൻ്റെ മനസ്സിൽ കയറിക്കൂടിയതാണ് ഊട്ടി ട്രെയിൻ എന്നു നമ്മൾ വിളിക്കുന്ന നീലഗിരി മൗണ്ടൻ റെയിൽവേ. എന്നാൽ ഇതുവരെയ്ക്കും എനിക്ക് ആ ട്രെയിനിൽ ഒന്ന് സഞ്ചരിക്കുവാൻ സാധിച്ചിരുന്നില്ല. കഴിഞ്ഞ ദിവസം ആനക്കട്ടിയിലെ എസ് ആർ ജംഗിൾ റിസോർട്ടിൽ ചെന്നപ്പോൾ സുഹൃത്ത് സലീഷേട്ടൻ പറഞ്ഞപ്പോഴാണ് ഈ കാര്യം എൻ്റെ ഓർമ്മയിൽ വന്നത്. അങ്ങനെ അതിരാവിലെ ഞങ്ങൾ ആനക്കട്ടിയിലെ റിസോർട്ടിൽ നിന്നും മേട്ടുപ്പാളയം – ഊട്ടി ട്രെയിൻ യാത്രയ്ക്കായി പുറപ്പെട്ടു.

യുനസ്കോയുടെ ലോക പൈതൃക പട്ടികയിൽ ഉൾപ്പെട്ടിട്ടുള്ള ഈ റെയിൽവേ റൂട്ടിന് ഒത്തിരി സവിശേഷകൾ ഉണ്ട്. റാക്ക് റെയിൽ‌വേ പാതകൾ ഉപയോഗിക്കുന്ന ഇന്ത്യയിലെ ഒരേയൊരു തീവണ്ടിപാതയാണ് ഇത്. ഇതിന്റെ പാതയുടെ വീതി 1 വലിപ്പത്തിൽ മീറ്റർ ഗേജ് ആണ്. മേട്ടുപ്പാളയത്തിനും കുന്നൂരിനും ഇടക്ക് തീവണ്ടി റാക് സിസ്റ്റം ഉപയോഗിച്ചാണ് ഓടുന്നത്. ഇവിടത്തെ റാക്ക് സിസ്റ്റം ആൾട്ടർനേറ്റ് ബയ്റ്റിങ്ങ് ടീത്ത് രീതിയിലുള്ളതാണ്. വലിയ കയറ്റങ്ങൾ കയറാൻ നീരാവി കൊണ്ട് പ്രവർത്തിക്കുന്ന ‘X’ ക്ലാസ്സിൽ പെടുന്ന എൻ‌ജിനുകളാണ് ഉപയോഗിക്കുന്നത്. 1918 – 1950 കാലഘട്ടത്തിൽ നിർമിച്ച എൻ‌ജിനുകളാണു ഇപ്പോഴും ഉപയോഗിക്കുന്നത്.

രാവിലെ ഞങ്ങൾ മേട്ടുപ്പാളയം റെയിൽവേ സ്റ്റേഷനിൽ എത്തിച്ചേർന്നു. ഞങ്ങൾ വന്നത് റിസോർട്ടിലെ ജീപ്പിലായിരുന്നു. സലീഷേട്ടനും ഞങ്ങളുടെകൂടെ യാത്രയ്ക്കായുണ്ട്. ഞങ്ങളെ സ്റ്റേഷനിൽ ഇറക്കിയ ശേഷം ജീപ്പുമായി ഡ്രൈവർ ഊട്ടിയിലേക്ക് തിരിച്ചു. ഞങ്ങൾ അവിടെ ഇറങ്ങുമ്പോൾ പുള്ളി കാത്തു നിൽക്കുന്നുണ്ടാകും. ഞങ്ങൾ IRCTC വെബ്സൈറ്റിൽ നിന്നും തൽക്കാൽ ടിക്കറ്റ് ആയിരുന്നു എടുത്തിരുന്നത്. ഭാഗ്യത്തിന് ടിക്കറ്റ് കിട്ടി.

നമ്മുടെ ട്രെയിൻ യാത്രയ്ക്ക് തയ്യാറെടുത്തുകൊണ്ട് പ്ലാറ്റഫോമിൽ കിടക്കുന്നുണ്ടായിരുന്നു. ട്രെയിനിന്റെ മുൻ ഭാഗത്താണ് ഫസ്റ്റ് ക്‌ളാസ്സ് കൂപ്പേകൾ. ഇതുകൂടാതെ ജനറൽ കമ്പാർട്ട്മെന്റും ട്രെയിനിലുണ്ട്. ജനറൽ കോച്ചുകളിൽ ടിക്കറ്റുകൾ സ്റ്റേഷനിൽ നിന്നും എടുക്കുന്നതിനായി ആളുകൾ വെളുപ്പിനെ തന്നെ ക്യൂവിൽ സ്ഥാനം പിടിക്കുമത്രേ. ധാരാളം യാത്രക്കാർ ഞങ്ങൾക്ക് മുന്നേ തന്നെ ട്രെയിനിൽ സ്ഥാനം പിടിച്ചിരുന്നു. എല്ലാവരും ടൂറിസ്റ്റുകളായിരുന്നു.

ട്രെയിൻ പുറപ്പെടുവാനുള്ള മുന്നറിയിപ്പായി സ്റ്റേഷനിൽ മണിയടിച്ചതോടെ ഞങ്ങൾ ഞങ്ങളുടെ സീറ്റിൽ കയറിയിരുന്നു. കുറച്ചുസമയത്തിനു ശേഷം ട്രെയിൻ ഞങ്ങളെയും വഹിച്ചുകൊണ്ട് യാത്രയാരംഭിച്ചു. ജനവാസകേന്ദ്രങ്ങളും കൃഷിസ്ഥലങ്ങളും തോട്ടങ്ങളും പിന്നിട്ടുകൊണ്ട് ട്രെയിൻ പൊയ്‌ക്കൊണ്ടിരുന്നു. അടുത്ത സ്റ്റോപ്പ് ആയ കല്ലാർ സ്റ്റേഷനിൽ എത്തിയപ്പോൾ വെള്ളം നിറയ്ക്കുവാനായി ട്രെയിൻ കുറച്ചുസമയം നിർത്തിയിടുകയുണ്ടായി. ആവി എഞ്ചിൻ ആയതിനാലാണ് ഇങ്ങനെ ധാരാളം വെള്ളം ആവശ്യം വരുന്നത്. ഒരു തവണ സർവ്വീസ് നടത്താൻ ഈ തീവണ്ടിക്ക് ഏകദേശം 8,000 ലിറ്റർ വെള്ളം ആവശ്യമാണ്. ഇതിനാവശ്യമായ വെള്ളം ഭവാനി നദിയിൽ നിന്നുമാണ് എടുക്കുന്നത്. കുറച്ചു സമയത്തിനു ശേഷം ട്രെയിൻ വീണ്ടും യാത്ര തുടർന്നു.

പിന്നീട് അങ്ങോട്ട് കയറ്റം തുടങ്ങുകയായിരുന്നു. റെയിൽപാളത്തിനു നടുവിൽ ഘടിപ്പിച്ചിരിക്കുന്ന സവിശേഷമായ പൽച്ചക്രത്തിൽ കൊളുത്തിപ്പിടിച്ച് മല കയറാൻ കഴിയുന്ന റാക്ക് ആൻഡ് പിനിയൻ സങ്കേതമാണ് മലകയറ്റത്തിന് തീവണ്ടിയെ സഹായിക്കുന്നത്. പിന്നീട് അങ്ങോട്ട് ട്രെയിൻ വേഗത കുറച്ചായിരുന്നു പോയിരുന്നത്. പാറക്കെട്ടുകൾക്കിടയിലൂടെയും മലതുറന്നുണ്ടാക്കിയ ഏരിയയിലൂടെയും ഒക്കെ ട്രെയിൻ പോകുമ്പോൾ യാത്രക്കാർ ആഹ്ലാദഭരിതരായിരുന്നു. ഒരു തുരങ്കം കഴിഞ്ഞയുടനെ ഭീമാകാരനായ ഉയരത്തിൽ നിൽക്കുന്ന ഒരു പാലത്തിലൂടെ ട്രെയിൻ കടന്നുപോയി. ഈ റൂട്ടിലെ ഏറ്റവും മനോഹരമായ കാഴ്ചകളിൽ ഒന്നായിരുന്നു ആ പാലം.

പിന്നീട് ഒരു തുരങ്കം എത്തിയപ്പോൾ തുരങ്കത്തിലേക്ക് കയറുന്നതിനു മുൻപായി വീണ്ടും വെള്ളം നിറയ്ക്കുവാൻ ട്രെയിൻ അൽപ്പസമയം നിർത്തിയിടുകയുണ്ടായി. ആ സമയത്ത് യാത്രക്കാരെല്ലാം പുറത്തിറങ്ങി കാഴ്ചകൾ ആസ്വദിച്ചു. അവിടെ കുരങ്ങന്മാരുടെ ശല്യം കൂടുതലായി ഉണ്ടായിരുന്നു. യാത്രക്കാർ സാധനങ്ങൾ കമ്പാർട്ട്മെന്റിൽ ഇട്ടിട്ടു പുറത്തേക്ക് പോയാൽ തക്കംപാർത്തിരിക്കുന്ന കുരങ്ങന്മാർ അവ എടുത്തുകൊണ്ട് പോകും. വെള്ളം നിറച്ച ശേഷം ട്രെയിൻ വീണ്ടും യാത്രയാരംഭിച്ചു. നിർത്തിയിട്ടു വീണ്ടും ട്രെയിൻ എടുക്കുമ്പോൾ മൂന്നു വിസിലുകൾ അടിക്കും. ആദ്യത്തെ വിസിൽ എല്ലാ യാത്രക്കാരും ട്രെയിനിൽ കയറുവാനുള്ളതാണ്. രണ്ടാമത്തെ വിസിൽ ഒരു വാണിങ് ആണ്. ഇനിയും കയറാത്തവർ ഉണ്ടെങ്കിൽ ഉടൻതന്നെ കയറുക, ട്രെയിൻ ഇപ്പോൾ എടുക്കും എന്നാണിത് അർത്ഥമാക്കുന്നത്. മൂന്നാമത്തെ വിസിലോടു കൂടി ട്രെയിൻ യാത്രയാകും. അതുകൊണ്ട് യാത്രക്കാരെല്ലാം ആദ്യ വിസിലിൽ തന്നെ ട്രെയിനിൽ കയറുക.

എല്ലാ സ്റ്റേഷനുകളിലും വെള്ളം നിറയ്ക്കുവാനായി ട്രെയിൻ കുറച്ചു സമയം നിർത്തിയിടും. ഈ സമയത്ത് യാത്രക്കാർക്ക് ടോയ്ലറ്റിൽ പോകുകയോ ഭക്ഷണം കഴിക്കുകയോ ഒക്കെ ചെയ്യാം. ട്രെയിൻ ജീവനക്കാരെല്ലാം യാത്രക്കാരോട് സൗഹാർദ്ദപരമായായിരുന്നു പെരുമാറിയിരുന്നത്. മേട്ടുപ്പാളയത്തു നിന്നും ഊട്ടിയിലേക്ക് 46 കിലോമീറ്റർ ദൂരമാണുള്ളത്. ട്രെയിൻ ഈ ദൂരം താണ്ടുവാണെടുക്കുന്നത് അഞ്ചു മണിക്കൂറുകളാണ്. അങ്ങനെ ഞങ്ങൾ കൂനൂർ റെയിൽവേ സ്റ്റേഷനിൽ എത്തിച്ചേർന്നു.പിന്നീട് അവിടുന്ന് ഊട്ടിയിലേക്ക് ഡീസൽ എഞ്ചിൻ ഉപയോഗിച്ചാണ് ട്രെയിൻ പോകുന്നത്. ഞങ്ങൾ വന്ന വണ്ടി അവിടെ നിർത്തിയശേഷം ആവി എഞ്ചിൻ വേര്പെടുത്തുകയും ഡീസൽ എഞ്ചിനും ഒരു കമ്പാർട്ട്മെന്റും കൂടി ട്രെയിനോട് ചേർത്തു. ഈ കാഴ്ചയെല്ലാം യാത്രക്കാർക്ക് നേരിട്ടു കാണാവുന്നതാണ്.

അങ്ങനെ ഞങ്ങൾ കൂനൂരിൽ നിന്നും ഊട്ടിയിലേക്ക് ഡീസൽ എഞ്ചിനുമായി യാത്രയായി. മേട്ടുപ്പാളയം മുതൽ കൂനൂർ വരെയുള്ള റൂട്ടിലാണ് നല്ല കിടിലൻ കാഴ്ചകൾ ഉള്ളത്. കൂനൂരിനും ഒറ്റയ്ക്കും ഇടയിലുള്ള സ്റ്റേഷനുകളിൽ ട്രെയിൻ അധികനേരം നിർത്തിയിടുകയില്ല. ഇവിടങ്ങളിൽ യാത്രക്കാരും കുറവായിരിക്കും. പിന്നീട് കുറച്ചു സമയം നിർത്തിയിട്ടത് പ്രശസ്തമായ ‘Lovedale’ സ്റ്റേഷനിൽ ആയിരുന്നു. യാത്രക്കാർക്ക് ഇറങ്ങി ഫോട്ടയെടുക്കാനും മറ്റുമാണെന്നു തോന്നുന്നു അവിടെ ട്രെയിൻ നിർത്തിയിടുന്നത്. അങ്ങനെ ഞങ്ങൾ അവിടം കഴിഞ്ഞു ഊട്ടി റെയിൽവേസ്റ്റേഷനിൽ എത്തിച്ചേർന്നു. ഞാനും ശ്വേതയും സലീഷേട്ടനും അടക്കമുള്ള യാത്രക്കാരെല്ലാം വളരെ സന്തോഷഭരിതരായിരുന്നു. എന്തായാലും നല്ലൊരു അടിപൊളി യാത്രയായിരുന്നു.

നീലഗിരി മൗണ്ടൻ റെയിൽവേ എന്ന മേട്ടുപ്പാളയം മുതൽ കൂനൂർ വഴി ഊട്ടിയിലേക്കുള്ള ട്രെയിൻ യാത്ര പോകുന്നതിന് മുന്നേ നിങ്ങൾ അറിയേണ്ട കാര്യങ്ങൾ : 1) ടിക്കറ്റുകൾ മുൻകൂട്ടി ബുക്ക് ചെയ്തിട്ട് വന്നാൽ ബുദ്ധിമുട്ടില്ലാതെ യാത്ര ചെയ്യാം. IRCTC വെബ്‌സൈറ്റ്/ആപ്പ് മുഖേന ടിക്കറ്റ് എടുക്കാം. 2) ട്രെയിൻ പുറപ്പെടുന്നതിന്റെ തലേ ദിവസം രാവിലെ 11 മണിക്ക് തത്കാൽ ടിക്കറ്റ് ബുക്ക് ചെയ്തിട്ടും സീറ്റ് കരസ്ഥമാക്കാം.

3) ട്രെയിനിൽ ജനറൽ കമ്പാർട്ട്മെന്റ് ഉണ്ട്, അതിന്റെ ടിക്കറ്റ് ലഭിക്കാൻ റെയിൽവേ സ്റ്റേഷനിൽ അതിരാവിലെ 3 മണി മുതൽ ക്യൂ ഉണ്ടാകും, അവധി ദിവസങ്ങളിൽ ഇത്തരത്തിൽ ടിക്കറ്റുകൾ കിട്ടുവാൻ ബുദ്ധിമുട്ടും, ഇടദിവസം ആണെങ്കിൽ എളുപ്പം ആയിരിക്കും. 4) ഫസ്റ്റ് ക്ലാസ്സ് കോച്ചിൽ ഏറ്റവും മുന്നിലത്തെ കൂപ്പയാണ് ട്രെയിനിന്റെ ഏറ്റവും മുന്നിലുള്ളത്, ഏറ്റവും കൂടുതൽ വ്യൂ ലഭിക്കുന്നതും ഇവിടെ നിന്നാണ്.

5) മേട്ടുപ്പാളയം നിന്നും മുകളിലേക്ക് പോകുമ്പോൾ ട്രെയിനിന്റെ ഇടത് വശത്ത് ഇരിക്കുവാൻ ശ്രദ്ധിക്കുക. 6) ഏറ്റവും ഭംഗിയുള്ള സ്ഥലം മേട്ടുപ്പാളയം മുതൽ കൂണൂർ വരെയുള്ള യാത്രയാണ്. 7) കൂനൂർ മുതൽ ഊട്ടി വരെ ഡീസൽ എഞ്ചിൻ വെച്ചുള്ള യാത്രയാണ്, ഈ സെക്ടറിൽ ട്രെയിനുകൾ കൂടുതലുണ്ട്, പെട്ടന്ന് ടിക്കറ്റുകൾ ലഭിക്കും, പക്ഷെ മേട്ടുപ്പാളയത്ത് നിന്നും യാത്ര ചെയ്യുന്നതിന്റെ നൂറിൽ ഒന്ന് പോലും ഭംഗിയില്ല. 8) സ്റ്റേഷനുകളിൽ വണ്ടി നിർത്തുമ്പോൾ കുരങ്ങന്മാരെ ശ്രദ്ധിക്കുക, അറ്റാക്ക് ചെയ്യാൻ സാധ്യതയുണ്ട്.

ദിവസേന ഒരു ജോഡി ട്രെയിനുകൾ ആണ് ഓടുന്നത്. ഇത് മേട്ടുപ്പാളയത്ത് നിന്ന് 07:10 ന് പുറപ്പെട്ട് ഊട്ടിയിൽ 12 മണിക്ക് എത്തും. വൈകീട്ട് 2 ന് ഊട്ടിയിൽനിന്ന് പുറപ്പെട്ട് 5.35 ന് മേട്ടുപ്പാളയത്തെത്തും. കല്ലാർ അടർലി, ഹിൽനോവ്, റണ്ണിമേട്, കാട്ടേരി, വെല്ലിങ്ടൺ, ലവ്‌ഡേൽ, അറവങ്കാട് എന്നിവയാണ് ഇടയ്ക്കുള്ള സ്റ്റേഷനുകൾ. ഇത് നീലഗിരിയിൽ നിന്ന് ചെന്നൈയിലേക്ക് തിരിക്കുന്ന നീലഗീരി എക്സ്പ്രസ്സുമായി സമയബന്ധിതമാണ്. വിനോദസഞ്ചാരികളുടെ സൗകര്യാർത്ഥം കോയമ്പത്തൂർ ജങ്ഷനിൽനിന്ന് മേട്ടുപ്പാളയത്തേക്ക് രാവിലെ 5.15 ന് ബ്ലൂമൗണ്ടൻ എക്‌സ്​പ്രസ് തീവണ്ടിയുണ്ട്. 6.10 ന് തീവണ്ടി മേട്ടുപ്പാളയത്തെത്തും. ഇതേപോലെ തിരിച്ച് വൈകീട്ട് 7 ന് ബ്ലൂമൗണ്ടൻ മേട്ടുപ്പാളയത്തുനിന്ന് പുറപ്പെട്ട് രാത്രി 8.20 ന് കോയമ്പത്തൂർ ജങ്ഷനിലെത്തും.

ഈ തീവണ്ടിപ്പാതയിൽ കമ്പ്യൂട്ടർ അതിഷ്ഠിതമായ ടിക്കറ്റിംഗ് സംവിധാനം ഉണ്ടെങ്കിലും ഊട്ടി-മേട്ടുപ്പാളയം റൂട്ടിൽ ഇപ്പോഴും പഴയരീതിയിലുള്ള ടിക്കറ്റ് വിതരണ സമ്പ്രദായമാണ് നിലനിൽക്കുന്നത്. ഇത് പൈതൃകസ്മാരകത്തിന്റെ സ്ഥിതി നിലനിർത്തുന്നതിന് വേണ്ടിയാണ്. പക്ഷേ, ഇന്ത്യൻ റെയിൽ‌വേയുടെ വെബ്‌സൈറ്റ് വഴിയും ഈ പാതയിലെ ടിക്കറ്റ് ബുക്കിംഗ് ചെയ്യാവുന്നതാണ്.

കൂടുതൽ കാഴ്ചകൾ കണ്ട് അനുഭവിക്കുവാൻ വീഡിയോ കാണുക. ആനക്കട്ടിയിലുള്ള SR Jungle Resort ന്റെ കൂടുതൽ വിവരങ്ങൾക്ക് വിളിക്കാം: 9659850555.

ട്രെയിനിന്റെ വിവരങ്ങൾക്ക് കടപ്പാട് – വിക്കിപീഡിയ.

LEAVE A REPLY

Please enter your comment!
Please enter your name here